જુનાગઢ જીઆઇડીસી-1માં બારદાનના ગોડાઉનમાં ભીષણ આગ લાગી છે. બનાવની જાણ થતા જુનાગઢ ફાયર ઓફિસર દિપક જાની સહિતની ત્રણ ટીમ ઘટના સ્થળે પહોંચી હતી અને આગને કાબુમાં લેવા ૭૫ હજાર લિટર પાણીનો છંટકાવ કરાયો છે. તેમ છતાં વહેલી સવારથી લાગેલી આગ બપોર સુધી કાબુમાં આવી નથી. આગ કયા કારણોસર લાગી તે કારણ હજી જાણી શકાયું નથી. ફાયરની ટીમ દ્વારા આગને કાબુમાં લેવા પ્રયાસ કરવામાં આવી રહ્યા છે. આગથી બારદાન માલિકને લાખો રૂપિયાનું નુકસાન થયાનો અંદાજ સેવાઈ રહ્યો છે.

દિવસેને દિવસે આગની ઘટનાનું પ્રમાણ વધતું જાય છે. આ દરમિયાન લોકોના ટોળેટોળા ઘટના સ્થળે ઉમટી પડ્યા હતા. ગોડાઉન માલિકે કહ્યું કે મને સવારે ફોન આવ્યો અને કહેવામાં આવ્યું કે તમારા ગોદાઉનમાં આગ લાગી છે. એ સાંભળીને હું તરત જ અહિયાં પહોંચી ગયો છું અને ત્યારથી જ આગ પર કાબુ મેળવવાના પ્રયાસ થઇ રહ્યા છે. તેમણે કહ્યું કે ગોદાઉનમાં 40-50 લાખના બારદાન છે.