હવામાન વિભાગના પૂર્વાનુમાન અનુસાર તા. 27 થી 28 ડીસેમ્બર દરમિયાન દેવભૂમિ દ્વારકા, જામનગર, પોરબંદર સહિતના ગુજરાતના કેટલાક જિલ્લાઓમાં હળવા વરસાદની આગાહી થયેલ છે. જેને અનુલક્ષીને ખેડૂતોએ પાકના રક્ષણ માટે કેટલાંક તકેદારીનાં પગલા લેવા જિલ્લા ખેતીવાડી અધિકારીની યાદીમાં સુચવાયું છે.

ખેત ઉત્પાદિત પાક કે ખેતરમાં કાપણી કરેલ પાક ખુલ્લા હોય તો તેને તાત્કાલીક સલામત સ્થળે ખસેડવા અથવા પ્લાસ્ટિક કે તાડપત્રીથી યોગ્ય રીતે ઢાંકી દેવું અને ઢગલાની ફરતે માટીનો પાળો બનાવી વરસાદનું પાણી ઢગલાની નીચે જતું અટકાવવું. જંતુનાશક દવા અને ખાતરનો ઉપયોગ આ સમયગાળા પુરતો ટાળવો. ખાતર અને બિયારણના વિક્રેતાઓએ જથ્થો પલળે નહીં તે મુજબ ગોડાઉનમાં સુરક્ષિત રાખવો. એ.પી.એમ.સી.માં વેપારી અને ખેડુત મિત્રોએ અનાજ અને ખેતપેદાશો વરસાદથી સુરક્ષિત રાખવા. વેચાણ અર્થે આવતી પેદાશો આ દિવસો દરમિયાન લાવવાનું ટાળી શકાય અથવા અથવા સુરક્ષિત રીતે લાવવા.

આ અંગે વધુ જાણકારી જે-તે વિસ્તારના ગ્રામસેવક, વિસ્તરણ અધિકારી, તાલુકા અમલીકરણ અધિકારી, મદદનીશ ખેતી નિયામક, જિલ્લા ખેતીવાડી અધિકારી, નાયબ ખેતી નિયામક (તાલીમ) અથવા કિસાન કોલ સેન્ટર ટોલ ફ્રી નંબર ૧૮૦૦ ૧૮૦-૧૫૫૧ નો સંપર્ક કરવા એક યાદીમાં જણાવાયું છે.