પંજાબથી સૌરાષ્ટ્રમાં મોકલાવેલો રૂ.૧.૬૦ કરોડનો દારૂનો જથ્થો બે અલગ અલગ દરોડામાં પોલીસે ઝડપી લીધો છે. જેમાં સુરેન્દ્રનગરના સાયલા તાલુકાના વાટાવચ્છ ગામે એસએમસીની ટીમે દારૂના મોટા જથ્થાનું કટીંગ થાય તે પૂર્વે દરોડો પાડી રૂપિયા ૧.૧૯ કરોડના દારૂના જથ્થા સાથે હરિયાણાના ટ્રક ચાલક અને ક્લીનરને ઝડપી લીધો હતો. પોલીસે ૧૦,૩૬૩ બોટલ દારૂ, ત્રણ વાહનો સહિત કુલ રૂપિયા ૧.૪૨ કરોડનો મુદ્દામાલ કબજે કર્યો હતો. પોલીસ તપાસમાં દારૂનો આ જથ્થો પંજાબથી ટ્રકમાં ભરવામાં આવ્યો હતો.ટ્રકમાં પશુ ચારાની આડમાં દારૂનો આ જથ્થો છુપાવ્યો હતો. દારૂ મંગાવનાર તરીકે સાયલાના સુદામડામાં રહેતા દેવેન્દ્ર ઉર્ફે દીનો અને દશરથસિંહનું નામ ખુલ્યું છે. આ સહિત કુલ ૩૧ શખસોને પોલીસે વોન્ટેડ જાહેર કર્યા છે. જયારે ભાડલા પોલીસ અને એલસીબીની ટીમે ભંડારીયા ગઢડીયા જવાના રસ્તેથી ૪૧.૨૯ લાખનો દારૂનો જથ્થો ઝડપી લીધો હતો.

દારૂના આ દરોડાની જાણવા મળતી વિગતો મુજબ, એસએમસીના વડા નિર્લિપ્ત રાયની સૂચના હેઠળ ડિવાયએસપી કે.ટી.કામરીયાના સુપરવિઝનમાં એસએમસીની ટીમ પેટ્રોલિંગમાં હતી. દરમિયાન પીએસઆઇ એસ.વી. ગળચર તથા તેમની ટીમને એવી બાતમી મળી હતી કે, સાયલા તાલુકાના નવા તળાવ વિસ્તાર પાસે આવેલા વાટાવચ્છ ગામમાં દારૂના મોટા જથ્થાનું કટીંગ થઈ રહ્યું છે. જેથી આ બાતમીના આધારે એસએમસીની ટીમ અહીં પહોંચી હતી.

એસએમસીની ટીમે કટીંગ ટાંકણે દરોડો પાડી ટ્રકમાંથી રૂપિયા ૧,૧૯,૫૯,૯૦૦ ની કિંમતનો ૧૦,૩૬૩ બોટલ દારૂનો જથ્થો ઝડપી લીધો હતો. પોલીસે દારૂના આ જથ્થા સાથે હરિયાણાના ટ્રક ચાલક રિતેશ ધર્મપ્રકાશ ડાંગર અને ક્લીનર પંકજ કરણસિંહ ડાંગરની ધરપકડ કરી હતી. પોલીસે દારૂનો આ જથ્થો ત્રણ વાહન અને રોકડ રકમ સહિત કુલ રૂપિયા ૧,૪૨,૫૦૦ નો મુદ્દામાલ કબજે કર્યો હતો.

પોલીસે જણાવ્યું હતું કે, દારૂનો આ જથ્થો સાયલા તાલુકાના સુદામડા ગામના દેવેન્દ્ર ઉર્ફે દીનો ભરત બોરીચા અને દશરથસિંહ ચંદુભા ઝાલાએ મંગાવ્યો હતો. દશરથસિંહ ક્રેટા કારમાં દારૂના જથ્થાનું પાયલોટિંગ પણ કરી રહ્યો હતો. દારૂનો આ જથ્થો પંજાબથી સોનુ શેઠ નામના શખસે સપ્લાય કર્યો હોવાનું માલુમ પડ્યું છે. પોલીસે દારૂનો જથ્થો મંગાવનાર અને જથ્થો મોકલનાર, કાર વડે દારૂના આ જથ્થાનું પાયલોટીંગ કરનાર તેમજ દરોડા દરમિયાન નાસી જનાર શખસો સહિત કુલ ૩૧ શખસોને વોન્ટેડ જાહેર કરવામાં આવ્યા છે. ટ્રકમાં પશુચારાની આડમાં દારૂનો આ જથ્થો છુપાવવામાં આવ્યો હતો.

દારૂના અન્ય દરોડામાં રાજકોટ ગ્રામ્ય એલસીબી પી.આઈ વી.વી.ઓડેદરાની રાહબરી હેઠળ પીએસઆઇ એચ.સી. ગોહિલ તથા તેમની ટીમ પેટ્રોલિંગમાં હતી દરમિયાન એલસીબી અને ભાડલા પોલીસ સ્ટેશનના ઇન્ચાર્જ જે.એચ.સિસોદિયાના માર્ગદર્શન હેઠળ સ્થાનિક પોલીસની ટીમ દ્વારા બાતમીના આધારે ભંડારીયા ગામથી આગળ ગઢડીયા (જામ) ગામ જવાના રસ્તા પર વોચ ગોઠવી હતી. દરમિયાન અહીંથી પસાર થતા ટ્રેલર ટ્રકને અટકાવી તલાસી લેતા તેમાં સફેદ પાવડરની 400 થેલી પાછળ છુપાવેલો 41.23 લાખનો જથ્થો મળી આવ્યો હતો. જેથી પોલીસે દારૂ ટ્રેલર ટ્રક મોબાઈલ ફોન મળી કુલ રૂપિયા 51.47 લાખનો મુદ્દામાલ કબજે કર્યો હતો.

પોલીસે ટ્રેલર ટ્રકના ચાલક રાજસ્થાનના જયપુરમાં રહેતા મહેશ પ્રભુદયાલ શર્મા (ઉ.વ 55) ની ધરપકડ કરી હતી. પૂછપરછમાં પંજાબથી દારૂનો આ જથ્થો લઈ આવતો હોવાનું કહ્યું હતું.આ દારૂનો જથ્થો તેના પુત્ર અમિતે ભરી આપ્યાનું કહેતા અમિત ઉપરાંત દારૂ મંગાવનાર અને દારૂ મોકલનાર અજાણ્યા શખસોને પોલીસે વોન્ટેડ જાહેર કર્યા છે.