કારમાં જુદા જુદા ચોરખાના બનાવી દારૂ છુપાવીને હેરાફેરી કરતા ચાલકને બી-ડિવિઝન પોલીસે પૂર્વ બાતમીના આધારે મોરબી રોડ ઉપર સેટેલાઇટ ચોક નજીક વોંચ ગોઠવી કારમાંથી 375 બોટલ ઈંગ્લીશ દારૂ સાથે ઝડપી લઈ કાર-મોબાઈલ સહીત 3,77,813નો મુદામાલ કબ્જે કરી વધુ તપાસ હાથ ધરી છે.

પ્રાપ્ત વિગત મુજબ બી ડિવિઝન પોલીસ સ્ટેશનના પીઆઈ એસ.એસ.રાણેના માર્ગદર્શન હેઠળ પીએસઆઇ એ.બી.ચૌધરી સહિતની ટીમ પેટ્રોલીંગમાં હતી ત્યારે પો.કોન્સ.વિશ્વજીતસિંહ ઝાલા અને નરેશભાઈ ચાવડાને ચોક્કસ બાતમી મળી હતી કે, જીજે-15-સીક્યુ-0906 નંબરની કારમાં ઈંગ્લીશ દારૂની હેરાફેરી કરવામાં આવી રહી છે, જે બાતમીના આધારે પોલીસે સેટેલાઇટ ચોક નજીક વોંચ ગોઠવતા પસાર થતી કારને રોકી યુક્તિ પૂર્વકની તપાસ કરતા કારની લાઈટ, પેટ્રોલ ટેન્ક, આર્મ્સ રેસ્ટ, સ્પેરવ્હીલમાં ચોરખાના બનાવી છુપાવેલો 375 બોટલ ઈંગ્લીશ દારૂ મળી આવતા કાર ચાલક ધર્મેશ છીબુભાઈ નાયકા (રહે-ધરમપુર રોડ,અબ્રામા ઝરણા પાર્ક પાસે, વલસાડ)ને ઝડપી લઇ દારૂનો જથ્થો, કાર અને મોબાઈલ મળી કુલ રૂ.3,77,813નો મુદામાલ કબ્જે કરી ચાલક સામે ગુનો નોંધી દારૂ કોને આપવાનો હતો તે અંગે વધુ તપાસ હાથ ધરી છે.