પહેલાંનો સમય એવો હતો જ્યારે લોકો કાચા મકાનોમાં રહેતા હતા, ત્યારે તેઓ ઘરની દિવાલોથી લઈ છત સુધીની જગ્યાએ રંગને બદલે માટીથી લીપતા હતા. પરંતુ આધુનિક સમયમાં, શહેરી સંસ્કૃતિના વિકાસ પછી ઘરની દિવાલો પર  ડિસ્ટેમ્પર, પ્રવાહી મિશ્રણ અને પ્લાસ્ટિક પેઇન્ટ  કરવામાં આવે છે. જો કે આ કેમિકલયુક્ત કલરથી મુક્તિ અપાવવા માટે બજારમાં ઉપલબ્ધ થશે ગાયના છાણથી બનેલો ખાસ રંગ. ખાદી અને ગ્રામ ઉદ્યોગ પંચે ગાયના છાણમાંથી 'વૈદિક પેઇન્ટ' તૈયાર કર્યો છે. આ ઈકો ફ્રેન્ડલી પેઈન્ટ આજે લોન્ચ કરવામાં આવશે.  
 

ગાયના છાણમાંથી બનાવવામાં આવેલું હોવા છતાં, આ પેઈન્ટમાં વાસ નહીં આવે. આ ઉપરાંત આ પેઈન્ટ એન્ટિ-વાયરલ હશે. ખાસ વાત એ છે કે તેમાં સામાન્ય ડિસ્ટેમ્પર અથવા પેઇન્ટમાં હોય છે તેવા કોઈ ઝેરી કેમિકલ પણ નથી. એટલું જ નહીં, તે ગાયના છાણમાંથી બનાવેલું હોવાથી એન્ટિ-વાયરલ ગુણધર્મો ધરાવે છે. કોરોના વાયરસના યુગમાં, લોકોમાં એન્ટીવાયરલ ટૂથબ્રશથી માંડીને લેમિનેટ સુધીનો ક્રેઝ વધ્યો છે. આવી સ્થિતિમાં આ પેઇન્ટ બીજી ઘણી કંપનીઓના એન્ટી વાયરલ પેઇન્ટને પણ સ્પર્ધા આપશે.

બીઆઈએસના ધોરણોને પૂરા કરવા માટે પેઇન્ટને બીઆઈએસ દ્વારા પણ પ્રમાણિત કરવામાં આવ્યું છે. સામાન્ય પેઇન્ટમાં લીડ, પારો, કેડમિયમ, ક્રોમિયમ જેવા હાનિકારક ધાતુઓ શામેલ હોય છે. પરંતુ ખાદીના 'નેચરલ પેઇન્ટ'માં આવી કોઈ ધાતુ નથી. તેથી તે સામાન્ય રંગ કરતાં સસ્તુ પણ હશે. કારણ કે  તેમાં ગાયનું છાણ મુખ્ય ઘટક છે. આ પેઇન્ટ દેશના ખેડુતોની આવકમાં પણ વધારો કરશે.  સરકારના અંદાજ મુજબ આ પેઈન્ડ ખેડુતો અથવા ગૌશાળાઓને દર વર્ષે પ્રાણી દીઠ 30,000 રૂપિયાની વધારાની આવક આપશે.