એક્વાડોરમાં ભારે વરસાદે તબાહી મચાવી છે. વરસાદના કારણે લોકોને ભારે મુશ્કેલીનો સામનો કરવો પડે છે. મધ્ય ઇક્વાડોરમાં ભૂસ્ખલન બાદ 8 લોકોના મોત થયા છે. લોકો કાટમાળ નીચે દટાયા હોવાની સંભાવનાને જોતા બચાવ ટીમો તેમજ સ્થાનિક લોકોએ સર્ચ ઓપરેશન શરૂ કર્યું છે. ગયા અઠવાડિયે એક્વાડોરના ઘણા ભાગોમાં ભારે વરસાદને કારણે તબાહી સર્જાઈ છે. જેમાં બાનોસના લોકો સૌથી વધુ પ્રભાવિત થયા છે.

11 લોકો ગુમ

બાનેસમાં રવિવારે એક ટેકરીનો એક ભાગ તૂટી પડ્યો હતો અને કેટલાક મકાનો અને વાહનો પૂરમાં ધોવાઈ ગયા હતા. એક્વાડોરના રિસ્ક મેનેજમેન્ટ ઓફિસે એક અખબારી યાદીમાં જણાવ્યું હતું કે અત્યાર સુધીમાં 8 લોકોના મૃત્યુની પુષ્ટિ થઈ છે. 11 ગુમ છે અને 22 લોકો ઘાયલ છે. રવિવારે માર્યા ગયેલા લોકોની સંખ્યા છ પર હતી અને સોમવારે અધિકારીઓએ વધુ બે મૃતદેહોની શોધની પુષ્ટિ કરી હતી. રાજધાની ક્વિટોથી લગભગ 135 કિલોમીટર દૂર આવેલ બાનોસ એમેઝોનના જંગલની વચ્ચે એક પ્રખ્યાત પર્યટન સ્થળ છે. બચાવ કામગીરીમાં મશીનોનો પણ ઉપયોગ કરવામાં આવી રહ્યો છે.

વરસાદે મુશ્કેલીમાં વધારો કર્યો

છેલ્લા ઘણા દિવસોથી એક્વાડોર અને પ્રદેશના અન્ય ભાગોમાં ભારે વરસાદ પડી રહ્યો છે. આ સપ્તાહની શરૂઆતમાં અલ સાલ્વાડોરમાં ભૂસ્ખલનમાં બે બાળકોના મોત થયા હતા. આ વાવાઝોડાને કારણે સમગ્ર એક્વાડોરના હાઇવે અને પુલો પર કાદવ અને પૂરના પાણી ફરી વળ્યા હતા. જે એમેઝોનિયન પ્રાંતો સાથે દેશને જોડતા મુખ્ય માર્ગોને પણ નુકસાન પહોંચાડે છે. વરસાદને કારણે ત્યાંની સ્થિતિ એવી બની છે કે રાહત અને બચાવ કામગીરીમાં પણ મુશ્કેલીનો સામનો કરવો પડે છે.