બીજા વિશ્વયુદ્ધ પછી પહેલીવાર જાપાન તેની સંરક્ષણ નીતિમાં આક્રમક અને ટેકનોલોજીકલ પરિવર્તન તરફ આગળ વધી રહ્યું છે. તાજેતરમાં જાપાને તેના નૌકાદળના પરીક્ષણ જહાજ જેએસ અસુકા પર ઇલેક્ટ્રોમેગ્નેટિક રેલગનના સમુદ્રી પરીક્ષણો સફળતાપૂર્વક કર્યા. આ પરીક્ષણ માત્ર ટેકનિકલ દૃષ્ટિકોણથી જ મહત્વપૂર્ણ નથી, પરંતુ એશિયા-પેસિફિક ક્ષેત્રની વ્યૂહાત્મક પરિસ્થિતિને પણ બદલી શકે છે.

રેલગન એ એક ઇલેક્ટ્રોમેગ્નેટિક હથિયાર પ્રણાલી છે જે પરંપરાગત તોપોની જેમ વિસ્ફોટકોનો ઉપયોગ કરતી નથી, પરંતુ ખૂબ જ ઊંચી ઝડપે અસ્ત્રો છોડવા માટે ઇલેક્ટ્રોમેગ્નેટિક બળનો ઉપયોગ કરે છે. તેની ગતિ ૨,૫૦૦ મી/સેકન્ડ (૫,૬૦૦ માઇલ પ્રતિ કલાક) છે. આ અસ્ત્રનું વજન 320 ગ્રામ છે. તેની ગતિ અવાજ કરતા 6.5 ગણી વધારે છે. લંબાઈ 20 ફૂટ છે અને વજન લગભગ 8 ટન છે. આ સિસ્ટમ હાઇપરસોનિક મિસાઇલો અને હાઇ-સ્પીડ ફાઇટર પ્લેનને પણ નિશાન બનાવી શકે છે.

જાપાને રેલગનનું પરીક્ષણ કરતાની સાથે જ ચીન અને ઉત્તર કોરિયાની ચિંતા વધી ગઈ. આનું કારણ એ છે કે આ શસ્ત્ર પરંપરાગત સંરક્ષણ પ્રણાલી કરતાં ઘણું ઝડપી, સચોટ અને અસરકારક છે. નિષ્ણાતોના મતે, જાપાનની આ ટેકનોલોજી ચીનની હાઇપરસોનિક મિસાઇલ ક્ષમતાઓ માટે મોટો ખતરો બની શકે છે. ચીનના એક ભૂતપૂર્વ લશ્કરી પ્રશિક્ષકે આ હથિયારને "આક્રમક વ્યૂહરચનાની શરૂઆત" ગણાવ્યું છે. તેમણે ચેતવણી આપી હતી કે, જાપાનના આ પગલાથી બાકીના એશિયા માટે વ્યૂહાત્મક તણાવ પણ વધી શકે છે.

જાપાને 2016માં આ ટેક્નોલોજી પર કામ કરવાનું શરૂ કર્યું હતું. અમેરિકાએ પણ આ પ્રોજેક્ટ પર કામ શરૂ કર્યું હતું, પરંતુ 2021માં તેને અધવચ્ચે છોડી દીધું. ચીનને પણ અત્યારસુધી આમાં સફળતા મળી નથી અને તે હજુ પણ તેના પર કામ કરી રહ્યું છે. આથી, જાપાનની આ સફળતા તેને વૈશ્વિક લશ્કરી ટેક્નોલોજી સ્પર્ધામાં નિર્ણાયક ધાર આપી શકે છે.