આઈસીસી ચેમ્પિયન્સ ટ્રોફી 2025ની છેલ્લી ગ્રુપ સ્ટેજ મેચ 2 માર્ચે દુબઈમાં ભારત અને ન્યુઝીલેન્ડ વચ્ચે રમાઈ હતી. આ મેચમાં ટીમ ઈન્ડિયા 44 રનથી જીતવામાં સફળ રહી અને આ સાથે જ ટૂર્નામેન્ટના સેમિફાઈનલનો સમયપત્રક નક્કી થઈ ગયો. ભારત અને ન્યુઝીલેન્ડ પહેલાથી જ સેમિફાઇનલમાં પોતાનું સ્થાન નિશ્ચિત કરી ચૂક્યા હતા પરંતુ આ છેલ્લી ગ્રુપ સ્ટેજ મેચથી સ્પષ્ટ થઈ ગયું કે ફાઇનલ પહેલા કઈ ટીમ કોની સામે રમશે. ગ્રુપ બીમાંથી દક્ષિણ આફ્રિકા અને ઓસ્ટ્રેલિયા સેમિફાઇનલમાં પહોંચવામાં સફળ રહ્યા.ભારતે ન્યૂઝીલેન્ડને હરાવીને ગ્રુપ એમાં ટોચનું સ્થાન મેળવ્યું. હવે સેમિફાઇનલમાં, ટીમ ઇન્ડિયા કાલે 4 માર્ચે દુબઈમાં ઓસ્ટ્રેલિયા સામે ટકરાશે, જ્યારે ન્યુઝીલેન્ડનો સામનો દક્ષિણ આફ્ર સામે થશે. ન્યુઝીલેન્ડ અને દક્ષિણ આફ્રિકા 5 માર્ચે લાહોરના ગદ્દાફી સ્ટેડિયમમાં ટકરાશે. સેમિફાઇનલના સમયપત્રક પર નજર નાખ્યા પછી, 10 વર્ષ પછી ફરી એક અદ્ભુત સંયોગ બની રહ્યો હોય તેવું લાગે છે.

વર્ષ 2015માં, આઈસીસી વર્લ્ડ કપ ઓસ્ટ્રેલિયા અને ન્યુઝીલેન્ડની સંયુક્ત યજમાની હેઠળ રમાયો હતો. આ ચાર ટીમો આ ટુર્નામેન્ટની સેમિફાઇનલમાં પણ પહોંચી હતી, જે હવે આઈસીસી ચેમ્પિયન્સ ટ્રોફી 2025ની સેમિફાઇનલ બની ગઈ છે. રસપ્રદ વાત એ છે કે ચેમ્પિયન્સ ટ્રોફીના સેમિફાઇનલનું શેડ્યૂલ બિલકુલ 2015ના વન ડે વર્લ્ડ કપ જેવું જ છે. તે વર્લ્ડ કપમાં, ભારત અને ઓસ્ટ્રેલિયા એકબીજા સામે ટકરાયા હતા જ્યારે ન્યુઝીલેન્ડની ટીમ દક્ષિણ આફ્રિકા સામે ટકરાઈ હતી.

હવે પ્રશ્ન એ ઊભો થાય છે કે કઈ 2 ટીમો ફાઇનલમાં સ્થાન મેળવવામાં સફળ થશે. જો આપણે 2015ના વર્લ્ડ કપ પર નજર કરીએ તો ભારતને સેમિફાઇનલમાં ઓસ્ટ્રેલિયા સામે હારનો સામનો કરવો પડ્યો હતો. તે જ સમયે, ન્યુઝીલેન્ડે સેમિફાઇનલમાં દક્ષિણ આફ્રિકાને હરાવીને ટાઇટલ મેચમાં જગ્યા બનાવી હતી. ત્યારબાદ ઓસ્ટ્રેલિયાએ ફાઇનલમાં ન્યુઝીલેન્ડને હરાવીને ટાઇટલ જીત્યું. આનો અર્થ એ થયો કે ટીમ ઈન્ડિયા માટે આ સારા સંકેતો નથી.

ટીમ ઈન્ડિયાએ બદલો લેવો પડશે
જોકે આ વખતે ઓસ્ટ્રેલિયન ટીમ પાસે પેટ કમિન્સ, જોશ હેઝલવુડ અને મિશેલ સ્ટાર્ક જેવા મજબૂત બોલરો નથી, પરંતુ કાંગારૂ ટીમ ઘણીવાર આઈસીસી નોકઆઉટ મેચોમાં ટીમ ઈન્ડિયા પર પ્રભુત્વ ધરાવતી જોવા મળી છે. 2015 થી, ભારતે આઈસીસી વન ડે ઇન્ટરનેશનલ ઇવેન્ટ્સની નોકઆઉટ રમતો અથવા ફાઇનલમાં બે વાર ઓસ્ટ્રેલિયાનો સામનો કર્યો છે. ભારતીય ટીમ બંને વખત હારી ગઈ છે. ઓસ્ટ્રેલિયાએ આઈસીસી વન ડે ઇન્ટરનેશનલ વર્લ્ડ કપ 2023 ની ફાઇનલમાં પણ ટીમ ઇન્ડિયાને હરાવી અને વર્લ્ડ ચેમ્પિયન બન્યું. આ હારનું દુઃખ હજુ પણ ટીમ ઈન્ડિયા અને તેના ચાહકોને સતાવે છે.

2015થી આઈસીસી વન ડે ઇન્ટરનેશનલ ઇવેન્ટ્સની નોકઆઉટ રમતો/ફાઇનલમાં ભારતની હાર

1. 2015 વર્લ્ડકપ સેમી ફાયનલ - ઓસ્ટ્રેલિયા, SCG સામે હારી ગયું
2. 2017 સીટી ફાઇનલ - પાકિસ્તાન સામે હારી, ધ ઓવલ
3. 2019 વર્લ્ડકપ સેમી ફાયનલ - ન્યુઝીલેન્ડ સામે હારી, માન્ચેસ્ટર
4. 2023 વર્લ્ડકપ ફાઇનલ - ઓસ્ટ્રેલિયા સામે હાર, અમદાવાદ