ઈરાને દુબઈમાં વિશ્વની સૌથી મોટી તેલ રિફાઇનરી, અરામકો પર હુમલો કર્યો છે. રોઇટર્સના અહેવાલ મુજબ, ડ્રોન હુમલા બાદ સાઉદી અરેબિયાની સરકારી તેલ કંપની અરામકોએ આજે તેની રાસ તનુરા રિફાઇનરી બંધ કરી દીધી હતી. અહેવાલ મુજબ, બંધ થવાના સમાચાર મળતાં બ્રેન્ટ ક્રૂડ ઓઇલના ભાવમાં 9.32%નો વધારો થયો હતો.

આ સ્થળ સાઉદી અરેબિયાના સૌથી મોટા અને સૌથી વ્યૂહાત્મક ઉર્જા સ્થળોમાંનું એક છે. હુમલા બાદ, તેના પ્રોસેસિંગ કોમ્પ્લેક્સમાં આગ લાગી હતી. અધિકારીઓનું કહેવું છે કે આગ પર કાબૂ મેળવી લેવામાં આવ્યો છે અને કોઈ જાનહાનિની ​​પુષ્ટિ થઈ નથી, પરંતુ આ ઘટનાએ આ વિસ્તારમાં મહત્વપૂર્ણ ઉર્જા માળખા અંગે ચિંતા વ્યક્ત કરી છે. રોઇટર્સના અહેવાલ મુજબ, એક અધિકારીએ જણાવ્યું હતું કે અરામકોની રાસ તનુરા રિફાઇનરીને સાવચેતી રૂપે બંધ કરવામાં આવી છે. અધિકારીએ જણાવ્યું હતું કે પરિસ્થિતિ નિયંત્રણમાં છે.

ઈરાન યુદ્ધના ઉગ્ર સ્વરૂપને કારણે વિશ્વભરમાં ક્રૂડ ઓઈલના લગભગ પાંચમા ભાગનું દૈનિક વહન કરતા જળમાર્ગ, હોર્મુઝ સ્ટ્રેટ દ્વારા વેપાર લગભગ બંધ થઈ ગયો છે, જેના કારણે વૈશ્વિક સ્તરે ક્રૂડ ઓઈલના ભાવ ચાર વર્ષમાં સૌથી વધુ ઉંચા સ્તરે પહોંચી ગયા છે. જોકે ઈરાને સત્તાવાર રીતે ચેનલ બંધ કરી નથી, પરંતુ યુદ્ધ દરમિયાન જહાજ માલિકોએ સ્વ-લાદેલી નાકાબંધી લાદી છે.

સઉદી અરામકો વિશ્વની સૌથી મોટી તેલ અને ગેસ કંપનીઓમાંની એક છે. તે સાઉદી અરેબિયા સરકારની માલિકીની છે. તેની સ્થાપના 1933માં અમેરિકન કંપનીઓ સાથેના કરાર હેઠળ થઈ હતી. 1980માં તે સંપૂર્ણપણે સાઉદી સરકારના નિયંત્રણમાં આવી ગયું. કંપનીનું મુખ્ય મથક ધહરાનમાં આવેલું છે. અરામકો પાસે વિશ્વના સૌથી મોટા તેલ ભંડારોમાંથી એક છે અને તે દરરોજ લાખો બેરલ ક્રૂડ ઓઇલનું ઉત્પાદન કરે છે, જેના કારણે તે વૈશ્વિક ઊર્જા બજારની મુખ્ય સપ્લાયર બની ગઈ છે.

સઉદી અરેબિયાની અર્થવ્યવસ્થા મોટાભાગે આ કંપનીની આવક પર નિર્ભર કરે છે. અરામકો માત્ર ક્રૂડ ઓઇલનું ઉત્પાદન જ નથી કરતી, પરંતુ રિફાઇનિંગ, પેટ્રોકેમિકલ્સ અને કુદરતી ગેસના ક્ષેત્રમાં પણ સક્રિય છે. તેના નિયંત્રણ હેઠળ દુનિયાનું સૌથી મોટું પરંપરાગત તેલ ક્ષેત્ર, ગવાર, પણ આવે છે. 2019માં કંપનીએ શેરબજારમાં પોતાનો આઇપીઓ લોન્ચ કર્યો, જેને ઇતિહાસનો સૌથી મોટો આઇપીઓ માનવામાં આવ્યો હતો. તાજેતરના વર્ષોમાં અરામકો રિન્યુએબલ એનર્જી, હાઇડ્રોજન અને કાર્બન કેપ્ચર જેવી ટેકનોલોજીમાં રોકાણ વધારી રહી છે. આ કંપનીની ક્ષમતા લગભગ 5.5 થી છ લાખ બેરલ પ્રતિદિનની આસપાસ માનવામાં આવે છે. ઓઇલ એક્સપોર્ટ ટર્મિનલ રાસ તનૂરા વિશ્વના સૌથી મોટા ઓફશોર ઓઇલ લોડિંગ ટર્મિનલોમાંનું એક છે. અહીંથી મોટા તેલ ટેન્કરોમાં ક્રૂડ ઓઇલ ભરીને અમેરિકા, એશિયા અને યુરોપ સહિત ઘણા દેશોને મોકલવામાં આવે છે.