પશ્ચિમ એશિયાનું યુદ્ધ હવે રહેણાંક વિસ્તારો અને ઔદ્યોગિક એકમો સુધી પહોંચી ગયું છે. ઈઝરાયેલના હોમ ફ્રન્ટ કમાન્ડે રવિવારે એક ઈમરજન્સી એડવાઈઝરી જારી કરીને કેમિકલ પ્લાન્ટની આસપાસ રહેતા હજારો લોકોને ઘરોની બહાર ન નીકળવાની સખત સૂચના આપી છે. આ આદેશ ઈરાની મિસાઈલ હુમલા બાદ પ્લાન્ટમાંથી જોખમી કેમિકલ લીક થવાની સંભાવનાને પગલે લેવામાં આવ્યો છે.

પ્લાન્ટ પર મિસાઈલ હુમલો અને તેની અસર
મળતી વિગતો મુજબ, ઈરાન તરફથી છોડવામાં આવેલી એક શક્તિશાળી મિસાઈલ સીધી ઈઝરાયેલના એક મુખ્ય કેમિકલ પ્લાન્ટ પર પડી હતી. હુમલા બાદ પ્લાન્ટના અમુક હિસ્સામાં ભારે નુકસાન થયું છે અને ત્યાંથી રહસ્યમય ધુમાડો નીકળતો જોવા મળ્યો છે. સંરક્ષણ નિષ્ણાતો માને છે કે જો પ્લાન્ટમાં રહેલા રાસાયણિક ટેન્કરો ફાટશે, તો આસપાસના કિલોમીટર સુધીના વિસ્તારમાં ઝેરી ગેસ ફેલાઈ શકે છે.