દુબઈથી મળતા અહેવાલો મુજબ ઈરાનના વિદેશ મંત્રાલયે અમેરિકી રાષ્ટ્રપતિ ડોનાલ્ડ ટ્રમ્પના તે દાવાને સખત શબ્દોમાં નકારી કાઢ્યો છે જેમાં કહેવામાં આવ્યું હતું કે તેહરાને (ઈરાન) અમેરિકા પાસે યુદ્ધવિરામની માંગણી કરી છે. ઈરાનના વિદેશ મંત્રાલયના પ્રવક્તા ઈસ્માઈલ બગાઈએ બુધવારે જણાવ્યું હતું કે ટ્રમ્પના નિવેદનમાં રતીભર પણ સચ્ચાઈ નથી અને તે માત્ર એક ભ્રામક પ્રચાર છે.

હોર્મુઝની સામુદ્રધુની પર ઈરાની કમાન્ડનું નિયંત્રણ
ઈરાનના શક્તિશાળી લશ્કરી સંગઠન 'રિવોલ્યુશનરી ગાર્ડ' (IRGC) એ પણ એક આક્રમક નિવેદન જાહેર કર્યું છે. તેમણે જણાવ્યું કે, હોર્મુઝની સામુદ્રધુની (Strait of Hormuz) સંપૂર્ણપણે અને નિર્ણાયક રીતે ઈરાનના નિયંત્રણમાં છે. આ મહત્વપૂર્ણ જળમાર્ગ અમેરિકા કે અન્ય કોઈ પણ દુશ્મન દેશ માટે ખોલવામાં આવશે નહીં. IRGC એ ટ્રમ્પના સીઝફાયરના દાવાને 'હાસ્યાસ્પદ' ગણાવ્યો છે.

ટ્રમ્પની ધમકી અને ઈરાનનો જવાબ
અગાઉ ડોનાલ્ડ ટ્રમ્પે સોશિયલ મીડિયા પ્લેટફોર્મ 'ટ્રુથ સોશિયલ' પર દાવો કર્યો હતો કે ઈરાને અમેરિકા પાસે શાંતિની ભીખ માંગી છે. ટ્રમ્પે લખ્યું હતું કે, "મેં તેમને સાફ કહી દીધું છે કે જો હોર્મુઝનો રસ્તો નહીં ખોલવામાં આવે, તો અમેરિકા ઈરાન પર બોમ્બમારો ચાલુ રાખશે."

આ ધમકીના જવાબમાં ઈરાની સંસદની રાષ્ટ્રીય સુરક્ષા સમિતિના વડા ઈબ્રાહિમ અઝીઝીએ કહ્યું કે, જે દેશો નવા નિયમોનું પાલન નહીં કરે તેમના માટે હોર્મુઝના દ્વાર કાયમ માટે બંધ રહેશે.

'અમેરિકા પર શૂન્ય ભરોસો'
ઈરાનના વિદેશ મંત્રી અબ્બાસ અરગચીએ અમેરિકા સાથે કોઈ પણ પ્રકારના રાજદ્વારી કરારની શક્યતાને નકારી કાઢી છે. તેમણે ભારપૂર્વક કહ્યું કે, "અમેરિકા અને ઈરાન વચ્ચે અત્યારે શૂન્ય ભરોસો છે. અમેરિકાની વાતોમાં ક્યારેય પ્રામાણિકતા હોતી નથી અને ભૂતકાળમાં તેમની સાથે વાતચીતનો અનુભવ અત્યંત કડવો રહ્યો છે."

​​​​​​​હોર્મુઝની સામુદ્રધુની વિશ્વના તેલ પુરવઠા માટે જીવનરેખા સમાન છે. ઈરાન દ્વારા આ માર્ગ બંધ કરવાની ધમકી અને અમેરિકાના સતત હુમલાઓને કારણે વૈશ્વિક બજારમાં ક્રૂડ ઓઈલના ભાવમાં મોટો ઉછાળો આવવાની ભીતિ સેવાઈ રહી છે.