દેશના છૂટક ફુગાવાના દરમાં ઘટાડો થયો હોવા છતાં, રાષ્ટ્રીય આંકડાકીય કાર્યાલય (એનએસઓ) ના ડેટામાં એક ચોંકાવનારી વાત સામે આવી છે. તેમના એક ડેટામાં જાણવા મળ્યું છે કે ફેબ્રુઆરી મહિનામાં કેરળમાં ફુગાવો સૌથી વધુ હતો, જ્યારે તેલંગાણામાં તે સૌથી ઓછો હતો. આ દર્શાવે છે કે કેટલાક મોટા રાજ્યોમાં ભાવ દબાણ હજુ પણ યથાવત છે.

ફેબ્રુઆરીમાં કેરળમાં ફુગાવાનો દર સૌથી વધુ ૭.૩ ટકા હતો, ત્યારબાદ છત્તીસગઢમાં ૪.૯ ટકાનો ફુગાવો નોંધાયો હતો. તેવી જ રીતે, કર્ણાટકમાં ફુગાવાનો દર ૪.૫ ટકા, બિહારમાં ૪.૫ ટકા અને જમ્મુ અને કાશ્મીરમાં ૪.૩ ટકા હતો. તેલંગાણામાં છૂટક ફુગાવો સૌથી ઓછો ૧.૩ ટકા હતો. તે પછી, ૧.૫ ટકા સાથે દિલ્હી અને ૨.૪ ટકા સાથે આંધ્રપ્રદેશ અનુક્રમે બીજા અને ત્રીજા સ્થાને છે. ડેટા દર્શાવે છે કે 22 રાજ્યોમાંથી 13 રાજ્યોમાં ફુગાવાનો દર ભારતીય રિઝર્વ બેંકના 4 ટકાના લક્ષ્ય કરતાં ઓછો હતો.

એનએસઓ દ્વારા જારી કરાયેલા ડેટા દર્શાવે છે કે ગ્રાહક ભાવ સૂચકાંક (સીપીઆઈ) દ્વારા માપવામાં આવતો છૂટક ફુગાવો જાન્યુઆરીમાં 4.3 ટકાથી ઘટીને ફેબ્રુઆરીમાં 3.6 ટકા થયો છે, જે સાત મહિનામાં સૌથી નીચો છે. આનું કારણ ખાદ્ય ચીજવસ્તુઓના ભાવમાં ઘટાડો છે. આનાથી એપ્રિલ મહિનામાં રિઝર્વ બેંક દ્વારા વ્યાજ દરમાં ઘટાડો થવાની આશા વધી ગઈ છે.

અહેવાલ મુજબ, એસબીઆઈના ગ્રુપ ચીફ ઇકોનોમિક એડવાઇઝર સૌમ્ય કાંતિ ઘોષે જણાવ્યું હતું કે, જો આપણે રાજ્યવાર ફુગાવાના દર પર નજર કરીએ તો, ફેબ્રુઆરીમાં મોટા રાજ્યોમાં ફુગાવો સરેરાશ કરતા વધારે રહ્યો છે. તેમણે કહ્યું કે 12 રાજ્યો એવા છે જ્યાં ગ્રામીણ વિસ્તારોમાં ફુગાવો સમગ્ર ભારતના ગ્રામીણ વિસ્તારોમાં સરેરાશ કરતા વધારે રહ્યો છે. આ રાજ્યોના શહેરોની સ્થિતિ પણ આવી જ છે. તેમણે એમ પણ કહ્યું કે શહેરો કરતાં ગામડાઓમાં ફુગાવો વધુ છે. આ પાછળનું કારણ ખાદ્ય ચીજવસ્તુઓના ભાવમાં વધારો છે.