પોરબંદરમાં યુવાનની માતાની મજાક કરવાની ના પાડતા ત્રણ શખ્શોએ યુવાને માર મારતા પોલીસ ફરિયાદ નોંધાવવામાં આવી છે. બોખીરાના કે.કે.નગરમાં રહેતા રોહનગીરી દિનેશગીરી ગોસ્વામી નામના ૧૯ વર્ષના યુવાને એવી પોલીસ ફરિયાદ નોંધાવી છે કે તા. ૧૩-૧૦ના રાત્રે સાડા દસ વાગ્યે છાયામાં તેના માસા સુરેશગીરી નારણગીરીના ઘરે પ્રસંગ અનુસંધાને ગયો હતો. ત્યાં તેના મમ્મી નિર્મળાબેન પણ આવ્યા હતા. તેઓ દર્શન કરીને પાછા ઉભા થતા હતા ત્યારે રતનપર રોડ પર ચાણકય સ્કૂલ પાસે રહેતા દીપકગર નારણગર અપારનાથીએ રોહનગીરીના માતા નિર્મળાબેનની મજાક કરી હતી આથી ફરીયાદીએ તેને મજાક કરવાની ના પાડી હતી અને ત્યાંથી દીપકગર અને ફરિયાદી અલગ પડયા હતા. થોડા સમય પછી દીપકગરે ફોન કરીને રોહનગીરીને ઘર પાસે બોલાવ્યો હતો ત્યાં જતા રોહનગીરીને દીપકગરે ગાળો દઇને લાકડાના હાથાવાળી કુહાડી માથામાં મારી હતી ત્યારબાદ દીપકનો પિતા નારણગર અને ભાઇ જયગર પણ ત્યા આવ્યો હતો અને તેઓ બન્ને ફરિયાદીને ઢીકાપાટુનો માર મારવા લાગ્યા હતા અને ‘તુ પોલીસમાં ફરિયાદ કરીશ તો તને મારી નાખીશ’ તેવી ધમકી આપી હતી અને ચાલ્યા ગયા હતા ત્યારબાદ ફરીયાદીનો ભાઇ જસ્મીનગીરી આવી જતા તેણે રોહનગીરીને સરકારી ભાવસિંહજી હોસ્પિટલે દાખલ કરાવ્યો હતો અને ફરીયાદી તથા આરોપી એક જ સમાજના હોવાથી સમાધાનની વાતચીત ચાલુ હતુ પરંતુ આરોપીઓએ સમાધાન કરવાની ના પાડતા અંતે રોહનગીરીએ દીપકગર નારણગર અપારનાથી, જયગર નારણગર અપારનાથી અને નારણગર અપારનાથી સામે કમલાબાગ પોલીસ મથકમાં ફરીયાદ નોંધાવી છે.