શહેરના યુનિવર્સિટી પોલીસ સ્ટેશનની ટીમ દ્વારા ન્યુ રેસકોર્સ પાસે લાઈટ હાઉસમાં સ્માર્ટ સિટી ખાતે ત્રણ વાત તમારી, ત્રણ વાત અમારી કાર્યક્રમનું આયોજન કરવામાં આવ્યું હતું. જેમાં પોલીસે અહીંના રહેવાસીઓને આગામી તહેવાર સમયે બહારગામ જતી વેળાએ સોના-ચાંદીના ઘરેણાં અને રોકડ લોકરમાં મુકવા તેમજ પાડોશી અને પોલીસ સ્ટેશનને જાણ કરવા સલાહ આપી હતી.
ઉચ્ચ પોલીસ અધિકારીઓના આદેશના પગલે યુનિવર્સિટી પોલીસ સ્ટેશનના પીઆઇ એમ.જી.વસાવાની રાહબરી હેઠળ ન્યુ રેસકોર્સ પાસે આવેલા લાઈટ હાઉસ સ્માર્ટ સિટી ખાતે ત્રણ વાત તમારી, ત્રણ વાત અમારી મીટીંગનું આયોજન કરવામાં આવ્યું હતું. જેમાં પીઆઇ ઉપરાંત પીએસઆઇ એન.કે.પંડા, ડી.બી. કારેથા, શી ટીમ, સાયબર સ્કોવડ અને પોલીસ કર્મચારીઓ હાજર રહ્યા હતા.
આ કાર્યક્રમમાં પોલીસે નશામુકત ભારત વિશે જાગૃતિ લાવવા માહિતી આપી હતી તેમજ ટ્રાફિક અવેરનેસ તથા શી ટીમની કામગીરી સાયબર ફ્રોડથી બચવા અંગે જાગૃતિની માહિતી તથા પોલીસ મદદ માટે ૧૦૦ નંબરની હેલ્પલાઇન, સિનિયર સિટીઝન હેલ્પલાઇન ૧૦૯૬ સાઈબર ફ્રોડની હેલ્પલાઇન ૧૯૩૦ ની માહિતી આપી હતી. તથા શી ટીમ દ્રારા ગુડ ટચ, બેડ ટચની માહિતી આપવામાં આવી હતી.
કાર્યક્રમમાં પોલીસે ખાસ કરીને લોકોને આગામી દિવાળીના તહેવાર દરમિયાન બહારગામ જતી વખતે સોના–ચાંદીના ઘરેણા તથા રોકડ બેંક લોકરમાં મુકવા તથા પાડોશી તથા પોલીસને જાણ કરવા સમજ આપી હતી. આ ઉપરાંત રહીશો દ્રારા રજૂ કરવામાં આવેલી પોતાની ત્રણ વાત અને તેમના પ્રશ્નોનું નિરાકરણ લાવવા માટે પોલીસે બાહેંધરી આપી હતી. આ કાર્યક્રમમાં મહિલાઓ, બાળકો, સિનિયર સિટીઝનો તથા પુષો મળી ૧૦૦ જેટલા લોકો હાજર રહ્યા હતા