બોલીવૂડ એક્ટર સલમાન ખાનને વોટ્સએપ મેસેજ કરી મારી નાખવાની ધમકી આપનારનું ગુજરાત કનેક્શન ખુલ્યું છે. આથી મુંબઈ ક્રાઈમ બ્રાન્ચે વડોદરામાં ધામા નાખ્યા છે. સલમાન ખાનને ધમકી આપનાર વાઘોડિયા તાલુકાના રવાલ ગામનો એક યુવક નિકળ્યો છે. આ યુવકે સલમાન ખાનને વોટ્સએપમાં ધમકીનો મેસેજ કર્યો હોવાનું બહાર આવ્યું છે. જોકે મુંબઈ પોલીસે યુવકની પૂછપરછ કરી હતી. જેમાં પ્રાથમિક તપાસમાં આ યુવક માનસિક રીતે સ્વસ્થ હોવાનું બહાર આવ્યું છે.

રવાલ ગામના 26 વર્ષીય યુવકને શોધી કાઢ્યો

મુંબઈ પોલીસના વરલી ટ્રાફિક કંટ્રોલ રૂમના વોટ્સએપ નંબર પર અભિનેતા સલમાન ખાનને જાનથી મારી નાખવાની ધમકી મળ્યા બાદ મુંબઈ પોલીસે એફઆઈઆર નોંધી હતી. આ મેસેજમાં અભિનેતાને તેના ઘરે મારી નાખવાની અને તેના વાહનમાં બોમ્બ લગાવવાની ધમકી આપવામાં આવી હતી. તપાસનીશ ટીમે ધમકીભર્યો મેસેજ મોકલનાર ગુજરાતના વડોદરા નજીકના રવાલ ગામના 26 વર્ષીય યુવકને શોધી કાઢ્યો હતો.

મુંબઈ પોલીસની ટીમે આવીને આ બાબતે તપાસ કરી

વાઘોડિયા પોલીસ સ્ટેશન તરફીથી જણાવવામાં આવ્યું છે કે, મુંબઈ પોલીસે અમને જાણ કરી હતી કે સલમાન ખાનને ધમકીભર્યો મેસેજ રવાલ ગામમાંથી કરવામાં આવ્યો હતો. જેથી અમે આ બાબતે રવાલ ગામમાં જઈને તપાસ કરી હતી. આ દરમિયાન જાણવા મળ્યું હતું કે, રવાલ ગામમાં રહેતા 26 વર્ષીય મેન્ટલી ડિસ્ટર્બ યુવકની છેલ્લા 12 વર્ષથી વડોદરાની હોસ્પિટલમાં સારવાર ચાલી રહી છે અને તેને સોશિયલ મીડિયાનો ખુબ શોખ છે અને તેને મિત્રો ન હોવાથી તે ગમે તે લિંક આવે તેમાં જોડાય જાય છે. આ દરમિયાન ધમકીભર્યો મેસેજ મોકલી દીધો હતો. જેથી મુંબઈ પોલીસની ટીમે આવીને આ બાબતે તપાસ કરી હતી.

યુવકને ત્રણ દિવસમાં મુંબઈ પોલીસ સમક્ષ તબીબી પ્રમાણપત્ર સાથે હાજર રહેવા જણાવ્યું 

માનસિક અસ્થિર અને સારવાર લેતા વ્યક્તિને 2-3 દિવસમાં વરલી પોલીસ સમક્ષ હાજર થવા નોટિસ ફટકારાઇ છે. અજાણ્યા વ્યક્તિ વિરુદ્ધ ભારતીય ન્યાય સંહિતાની કલમ 351 (2) (3) (ગુનાહિત ધાકધમકી) હેઠળ કેસ નોંધ્યો હતો. તપાસ શરૂ કરી હતી અને તેનો રેલો વાઘોડિયા તાલુકાના રવાલ ગામે પહોંચ્યો હતો. પરિણામે મુંબઈ પોલીસ ટેક્નિકલ સર્વેલન્સના આધારે વડોદરા જિલ્લાના વાઘોડિયા તાલુકાના રવાલ ગામે પહોંચી હતી પૂછપરછ દરમિયાન ધમકીભર્યો મેસેજ કરનાર યુવકની માનસિક હાલત યોગ્ય નહીં હોવાનું બહાર આવ્યું છે. પરિણામે પરિવારજનોને યુવકને ત્રણ દિવસમાં મુંબઈ પોલીસ સમક્ષ તબીબી પ્રમાણપત્ર સાથે હાજર રહેવા જણાવ્યું છે.

આ હુમલાની જવાબદારી લોરેન્સ ગેંગે લીધી હતી

રવિવારે મોડીરાત્રે મોકલવામાં આવેલા મેસેજમાં એવું પણ લખ્યું હતું કે, સલમાન ખાનના ઘરમાં ઘૂસીને તેને મારી નાખશે. ગયા વર્ષે 14 એપ્રિલે જ સલમાન ખાનના ગેલેક્સી એપાર્ટમેન્ટ પર ફાયરિંગની ઘટના બની હતી. આ હુમલાની જવાબદારી લોરેન્સ ગેંગે લીધી હતી. આ કેસમાં પોલીસે 7 લોકોની ધરપકડ કરી હતી. આમાંથી 2 આરોપીઓને જામીન મળી ગયા છે અને એક આરોપીએ આત્મહત્યા કરી લીધી છે.