મે ૨૦૨૬ માસમાં સ્ટેટ જીએસટીની આવકમાં ૧૬ ટકાના શાનદાર વધારા સાથે ગુજરાત દેશના ટોપના રાજ્યોમાં સામેલ થયું છે. 2025માં મે મહિનામાં 6,166 કરોડ રૂપિયાની આવક હતી જેની સામે આ વર્ષે મે મહિનામાં સ્ટેટ જીએસટીની આવક 7,181 કરોડ રૂપિયા નોંધાઈ છે.

મે મહિનામાં કર્ણાટકના સ્ટેટ જીએસટી આવકમાં વાર્ષિક ધોરણે 17 ટકા, ગુજરાતના 16 ટકા, આંધ્રપ્રદેશના 16 ટકા, કેરળના 15 ટકા અને તેલંગાણામાં 14 ટકાનો વધારો થયો હતો. હરિયાણામાં 22 ટકાનો મજબૂત વધારો નોંધાયો હતો, જ્યારે દિલ્હી એક અપવાદ હતું, સેટલમેન્ટ પછીના કલેક્શનમાં 26 ટકાનો ઘટાડો થયો હતો. તાજેતરના ડેટા દર્શાવે છે કે જ્યારે સ્થાનિક વપરાશ સંબંધિત કર વસૂલાત આ મહિને મધ્યમ રહી હતી, ત્યારે નાણાકીય વર્ષની શરૂઆતમાં મજબૂત આયાત આવક જીએસટી વૃદ્ધિને ટેકો આપવાનું ચાલુ રાખ્યું હતું.

મે મહિનામાં, માલ અને સેવાઓના પુરવઠામાં સુધારો અને આયાતમાંથી વસૂલાતમાં સતત વધારાને કારણે કુલ જીએસટી વસૂલાત 3.2 ટકા વધીને રૂ.1.94 લાખ કરોડથી વધુ થઈ ગઈ છે. મે 2025 માં, કુલ જીએસટી વસૂલાત રૂ.1.88 લાખ કરોડ હતી. બીજી તરફ, એપ્રિલમાં રેકોર્ડ વસૂલાતની તુલનામાં, મે મહિનામાં વસૂલાત થોડી ઓછી હતી. એપ્રિલમાં, જીએસટી વસૂલાત કુલ રૂ.2.42 લાખ કરોડ હતી, જે મે મહિના કરતા નોંધપાત્ર રીતે વધારે હતી. 

અહેવાલ મુજબ, સ્થાનિક વ્યવહારોમાંથી કુલ સેન્ટ્રલ જીએસટી (સીજીએસટી) વસૂલાત રૂ.37,397 કરોડ, સ્ટેટ જીએસટી (એસજીએસટી) રૂ.45,143 કરોડ અને સંકલિત જીએસટી રૂ.51,990 કરોડ હતી. રિપોર્ટિંગ સમયગાળા દરમિયાન માલના કરપાત્ર પુરવઠામાં 26.9 ટકાનો વધારો થયો છે, જે સ્થાનિક માંગને પ્રતિબિંબિત કરે છે; સેવા ક્ષેત્રમાં વૃદ્ધિ 22.2 ટકા હતી, જે સ્થાનિક વપરાશમાં માળખાકીય મજબૂતાઈને પ્રતિબિંબિત કરે છે. મે મહિનામાં આયાતમાંથી આઇજીએસટી વસૂલાત 19.1 ટકા વધીને રૂ.59,654 કરોડ થઈ છે, જે ઔદ્યોગિક ક્ષમતામાં વિસ્તરણ દર્શાવે છે. ગુડ્સ અને સર્વિસ ટેક્સ (જીએસટી) રિફંડ 2.6 ટકા વધીને રૂ.27,281 કરોડ થયું છે. રિફંડ માટે સમાયોજિત કર્યા પછી, મે મહિનામાં ચોખ્ખી જીએસટી આવક 3.3 ટકા વધીને આશરે રૂ.1.67 લાખ કરોડ થઈ છે. એપ્રિલમાં જીએસટી વસૂલાત રૂ.2.43 લાખ કરોડની સર્વકાલીન ઉચ્ચતમ સપાટીએ પહોંચી ગઈ હતી.

નાણાકીય વર્ષ ૨૦૨૭ના પ્રથમ બે મહિનામાં, કુલ જીએસટી વસૂલાત ૬.૨ ટકા વધીને રૂ.૪.૩૭ લાખ કરોડ થઈ, જ્યારે ચોખ્ખી જીએસટી આવક ૫.૫ ટકા વધીને રૂ.૩.૭૮ લાખ કરોડ થઈ. એપ્રિલ-મે દરમિયાન કુલ સ્થાનિક આવક વાર્ષિક ધોરણે ૧.૩ ટકા વધીને રૂ.૩.૧૯ લાખ કરોડ થઈ, જ્યારે કુલ આયાત આવક ૨૨.૩ ટકા વધીને રૂ.૧.૧૭ લાખ કરોડ થઈ, જે કુલ વસૂલાતમાં આયાત-સંબંધિત કરના સતત યોગદાનને પ્રતિબિંબિત કરે છે.

રાજ્ય પ્રમાણે ડેટામાં વિવિધ વલણો દર્શાવવામાં આવ્યા છે. મોટા રાજ્યોમાં, કર્ણાટકમાં મે મહિનામાં સેટલમેન્ટ પહેલાના સ્ટેટજીએસટી કલેક્શનમાં 11 ટકાનો વધારો નોંધાયો હતો, જ્યારે મહારાષ્ટ્ર, આંધ્રપ્રદેશ અને ઉત્તરપ્રદેશમાં અનુક્રમે આઠ ટકા, 11 ટકા અને નવ ટકાનો વધારો નોંધાયો હતો. કેરળમાં 19 ટકાનો મજબૂત વધારો જોવા મળ્યો હતો, જ્યારે ગુજરાતના કલેક્શનમાં ત્રણ ટકાનો વધારો થયો હતો. તેનાથી વિપરીત, દિલ્હીમાં સેટલમેન્ટ પહેલાના સ્ટેટજીએસટી કલેક્શનમાં 36 ટકાનો તીવ્ર ઘટાડો જોવા મળ્યો હતો, જ્યારે તમિલનાડુ અને રાજસ્થાનમાં નજીવો ઘટાડો જોવા મળ્યો હતો.