ગુજરાતના એક વ્યક્તિએ આઈડેન્ટીટી ફ્રોડ અને આંતરરાષ્ટ્રીય છેતરપિંડીના કેસમાં પાકિસ્તાની નાગરિક બનીને યુએસમાં ઘૂસવાનો પ્રયાસ કર્યો પરંતુ દેશનિકાલ થયા પછી સીધો દિલ્હી પોલીસના હાથમાં આવી ગયો. આરોપી એ.સી. પટેલ 12 ફેબ્રુઆરી, 2025 ના રોજ યુએસથી ફ્લાઇટ એએ-292 દ્વારા દિલ્હીના આઈજીઆઈ એરપોર્ટ, ટર્મિનલ 3 પર ઉતર્યો. યુએસ ઇમિગ્રેશન અધિકારીઓએ તેને પકડીને ભારત પરત મોકલ્યા પછી અમેરિકામાં રહેવાના તેના સપના પર પાણી ફરી વળ્યું.

ભારતીય ઇમિગ્રેશન અધિકારીઓને જે આશ્ચર્ય થયું તેનું કારણ તેના હાથમાં રહેલો તેનો પાસપોર્ટ હતો. એ પાસપોર્ટ જે સંપૂર્ણપણે નકલી હતો. ઊંડાણપૂર્વક તપાસ કરતાં અધિકારીઓને જાણવા મળ્યું કે આ પાસપોર્ટ ખરેખર એક પાકિસ્તાની નાગરિક મોહમ્મદ નજીર હુસૈનનો હતો, જેની ઘણા સમય પહેલા ‘ગુમ’ થયાની ફરિયાદ નોંધાઈ હતી.

દુબઈમાં એક એજન્ટને પૈસા આપીને પોતાની ખોટી ઓળખ બનાવી
અધિકારીઓ દ્વારા પ્રશ્ન પૂછવામાં આવતા પટેલે કબૂલાત કરી કે તેણે દુબઈમાં એક એજન્ટને પૈસા આપીને પોતાની ખોટી ઓળખ બનાવી અને ગુજરાતીમાંથી પાકિસ્તાની બની ગયો એ પણ ફક્ત યુએસ જતી ફ્લાઇટમાં જગ્યા મેળવવા માટે.

પટેલે કાયદેસર રીતે નવો પાસપોર્ટ મેળવ્યો નહીં
તપાસકર્તાઓને જાણવા મળ્યું કે પટેલનો અસલી પાસપોર્ટ 2006 માં જારી કરવામાં આવ્યો હતો અને 2016માં તેની મુદત પૂરી થઈ ગઈ હતી. ત્યારથી પટેલે કાયદેસર રીતે નવો પાસપોર્ટ મેળવ્યો નહીં. તેના બદલે તેણે માનવ તસ્કરી નેટવર્ક હેઠળ પ્રવેશ કર્યો, જેણે તેની નકલી ઓળખ બનાવી અને દુબઈ થઈને તેની ગેરકાયદેસર મુસાફરીનું આયોજન કર્યું.

પોલીસ હજુ સુધી આ કેસમાં કોઈ નિષ્કર્ષ પર પહોંચી શકી નથી
પ્રાપ્ત માહિતી અનુસાર જાણવા મળ્યું કે માનવ દાણચોરો એવા પાસપોર્ટ પસંદ કરે છે જે યુએસ વિઝા મેળવવા માટે મજબૂત હોય અથવા યુએઈના કેટલાક નાગરિકોને યુ.એસ.માં ઘૂસી જવા માટે રેન્ડમલી પાસપોર્ટ આપે છે. જો કે, પોલીસ હજુ સુધી આ કેસમાં કોઈ નિષ્કર્ષ પર પહોંચી શકી નથી.

દેશ નિકાલનો આ કોઈ એક કેસ નથી
દેશનિકાલનો આ કોઈ એક કેસ નથી. માત્ર છેલ્લા એક મહિનામાં, 74 ગુજરાતીઓ સહિતના ભારતીયોને દેશનિકાલ કર્યા હોય એવી ઓછામાં ઓછી ત્રણ ફ્લાઇટ્સ યુએસ સત્તાવાળાઓ દ્વારા હાંકી કાઢવામાં આવ્યા પછી ભારત પરત આવી. અમેરિકન એજન્સીઓએ જાન્યુઆરી 2025 થી ડોનાલ્ડ ટ્રમ્પના નવા શાસનને પગલે બિનદસ્તાવેજીકૃત ભારતીયો પરની કાર્યવાહીને વધુ તીવ્ર બનાવી છે, યુ.એસ.માં ગેરકાયદેસર રીતે રહેતા વ્યક્તિઓને ઝડપી લીધા છે અને તેમને ઘરે પાછા મોકલ્યા છે.