વૈશ્વિક આર્થિક મંદીની વચ્ચે, ભારતનું અર્થતંત્ર ઝડપથી વિકસી રહ્યું હોવાની ધારણા વ્યક્ત કરવામાં આવી છે. વૈશ્વિક રોકાણ બેંક ગોલ્ડમેન સૅક્સના જણાવ્યા અનુસાર, ભારત ૨૦૨૫માં ૭.૬ ટકા અને ૨૦૨૬માં ૬.૭ ટકાનો જીડીપી વૃદ્ધિદર નોંધાવી શકે છે. આ દરો ભારતને વિશ્વના મુખ્ય અર્થતંત્રોમાં સૌથી ઝડપથી વિકસતો દેશ બનાવે છે.

અહેવાલ મુજબ, આ જ સમયગાળા દરમિયાન ચીનનો આર્થિક વિકાસ ૫ ટકાથી નીચે રહેવાનો અંદાજ છે, જ્યારે અમેરિકા અને યુરોઝોનમાં વૃદ્ધિદર ૩ ટકાથી નીચે રહી શકે છે. ૨૦૨૬માં વૈશ્વિક જીડીપી વૃદ્ધિદર સરેરાશ ૨.૮ ટકા રહેવાનો અંદાજ છે, જે ભારતની અંદાજિત ગતિ કરતાં ઘણો પાછળ છે.

મજબૂત સ્થાનિક માંગ, માળખાગત રોકાણ અને પ્રમાણમાં સ્થિર મેક્રોઇકોનોમિક પરિસ્થિતિઓ ભારતના આર્થિક વિકાસમાં મુખ્ય ભૂમિકા ભજવી રહી છે. રિપોર્ટ મુજબ, આ પરિબળો ભારતને ચીન અને પશ્ચિમી દેશોથી અલગ પાડે છે.રિપોર્ટ ચીનના અર્થતંત્રનું મિશ્ર ચિત્ર રજૂ કરે છે. 2026 માં જીડીપી વૃદ્ધિ 4.8 ટકા રહેવાનો અંદાજ છે. ગોલ્ડમેન સૅક્સના મતે, ચીનનું ઉત્પાદન ક્ષેત્ર હજુ પણ મજબૂત રીતે વધી રહ્યું છે અને ઓછી કિંમતે ઉચ્ચ-ગુણવત્તાવાળા ઉત્પાદનોનું ઉત્પાદન કરવાની તેની ક્ષમતા અકબંધ છે. બેંકના મુખ્ય અર્થશાસ્ત્રી, જાન હેટ્ઝિયસના મતે, ઊંચા ટેરિફ હોવા છતાં, ચીને નિકાસ પરની અસરને મોટાભાગે સરભર કરી છે.

ચીનનું અર્થતંત્ર અનેક બાબતોમાં નબળું પડ્યાનો ઉલ્લેખ

રિપોર્ટમાં એમ પણ જણાવાયું છે કે ચીનના સ્થાનિક અર્થતંત્રના ઘણા ભાગોમાં નબળાઈ યથાવત છે. પ્રોપર્ટી ક્ષેત્ર 2026 માં જીડીપી વૃદ્ધિને આશરે 1.5 ટકા પોઈન્ટથી નકારાત્મક અસર કરી શકે છે. મજબૂત ઉત્પાદન અને નબળી સ્થાનિક માંગ ચીનના ચાલુ ખાતાના સરપ્લસમાં વધારો કરે તેવી અપેક્ષા છે, જે આગામી વર્ષોમાં વૈશ્વિક અર્થતંત્રને અસર કરી શકે છે.ગોલ્ડમેન સૅક્સના મતે, 2026 માં યુએસ જીડીપી વૃદ્ધિ 2.6 ટકા સુધી પહોંચી શકે છે, જ્યારે યુરો ઝોન અર્થતંત્ર 1.3 ટકાના દરે વૃદ્ધિ પામવાનો અંદાજ છે. રિપોર્ટમાં એ પણ સંકેત આપવામાં આવ્યો છે કે વિકસિત દેશોમાં ફુગાવાનું દબાણ ઓછું થવાની શક્યતા છે અને વ્યાજ દરમાં ઘટાડો થવાની શક્યતા છે.