છત્તીસગઢના બીજાપુરના સુરક્ષા દળોની ટીમે એક હજારથી વધુ નક્સલીઓને ઘેરી લીધા છે અને એન્કાઉન્ટરમાં પાંચ નક્સલીઓને ઠાર માર્યા છે.સૂત્રોના જણાવ્યા અનુસાર, છત્તીસગઢના બીજાપુર જિલ્લામાં આંતર-રાજ્ય સરહદ પર કરેગુટ્ટા ટેકરીઓના જંગલોમાં વહેલી સવારે સુરક્ષા દળોની એક સંયુક્ત ટીમ નક્સલ વિરોધી કાર્યવાહી પર નીકળી હતી. આ દરમિયાન નક્સલીઓએ સુરક્ષા દળો પર ગોળીબાર કર્યો. પછી સૈનિકોએ વળતો જવાબ આપ્યો અને એન્કાઉન્ટરમાં પાંચ નક્સલીઓને ઠાર માર્યા.સૂત્રોએ એમ પણ જણાવ્યું હતું કે છત્તીસગઢના બીજાપુરમાં, સુરક્ષા દળોની ટીમે અત્યાર સુધીના સૌથી મોટા ઓપરેશનમાં 1000 થી વધુ નક્સલીઓને ઘેરી લીધા છે. આ ઓપરેશનમાં છત્તીસગઢ, તેલંગાણા અને મહારાષ્ટ્રના 20,000 થી વધુ સૈનિકો સામેલ છે.

અગાઉ, સુરક્ષા દળોની ટીમે તેના સર્ચ ઓપરેશનમાં બીજાપુરની ટેકરી પર કોંક્રિટ સ્લેબથી બનેલા બંકર જેવા રૂમ સહિત 12 નક્સલી ઠેકાણા શોધી કાઢ્યા અને તેનો નાશ કર્યો.આ અંગે માહિતી આપતાં એક અધિકારીએ જણાવ્યું કે આ ઓપરેશન સીઆરપીએફના સ્પેશિયલ યુનિટ કોબ્રા (કમાન્ડો બટાલિયન ફોર રિઝોલ્યુટ એક્શન) ની 208મી બટાલિયન દ્વારા જીદપલ્લી કેમ્પથી હાથ ધરવામાં આવ્યું હતું. તેમણે કહ્યું કે એક છુપાવાનું સ્થળ 160 ચોરસ ફૂટના બંકર જેવું હતું. તેના પર કોંક્રિટનો સ્લેબ હતો. ત્યાંથી છ સોલાર પ્લેટ, બે નક્સલીઓની વર્દી, બે પંખા અને અન્ય સામગ્રી મળી આવી હતી.