નોઈડાથી દિલ્હી તરફ આગળ વધી રહેલા હજારો ખેડૂતોને દલિત પ્રેરણા સ્થળ પર રોકી દેવામાં આવ્યા છે. પોલીસ અને વહીવટીતંત્રના અધિકારીઓ સાથે લાંબી વાતચીત પછી ખેડૂતોએ નિર્ણય લીધો છે કે, તેઓ પ્રેરણા સ્થળની અંદર તેમનો વિરોધ ચાલુ રાખશે.

બેરિકેડ્સને હટાવી દેવામાં આવ્યા

હજારો ખેડૂતો પોતાની માગણીઓ સાથે નોઈડાથી દિલ્હી તરફ કૂચ કરી રહ્યા હતા. તેમને દલિત પ્રેરણા સ્થળ પર રોકવામાં આવ્યા છે. પોલીસ અને વહીવટી તંત્રના અધિકારીઓ સાથે લાંબી વાતચીત પછી, ખેડૂતોએ નિર્ણય લીધો છે કે, તેઓ પ્રેરણા સ્થળની અંદર તેમનો વિરોધ ચાલુ રાખશે. ખેડૂતોના આ પગલા બાદ દિલ્હી-નોઈડા બોર્ડર પર લગાવવામાં આવેલા બેરિકેટ્સને હટાવી દેવામાં આવ્યા છે.

આ વખતે વન ટુ વન ફાઈટ છે

ભારતીય કિસાન યુનિયનના નેતા ચૌધરી બી.સી. પ્રધાન તરફથી મોટું નિવેદન આવ્યું છે. તેમનું કહેવું છે કે, વહીવટી તંત્ર સાથે વાતચીત બાદ નિર્ણય લેવામાં આવ્યો છે કે, જ્યાં સુધી તેમની માગણીઓ પૂરી ન થાય ત્યાં સુધી તેઓ પ્રેરણા સ્થળની અંદર તેમનો વિરોધ ચાલુ રાખશે. જો માગણીઓ જલ્દી નહીં સંતોષાય તો અમે ફરી એકવાર દિલ્હી સુધી કૂચ કરીશું. આ વખતે વન ટુ વન ફાઈટ છે.

અધિકારીઓએ ખેડૂત નેતાઓને ખાતરી આપી

જિલ્લા વહીવટી તંત્ર, નોઈડા ઓથોરિટી અને યમુના ઓથોરિટીના અધિકારીઓ દ્વારા ખેડૂત નેતાઓને ખાતરી આપવામાં આવી હતી કે, તેમની માગણીઓ યુપીના મુખ્ય સચિવ સુધી પહોંચાડવામાં આવી રહી છે. ત્યાં સુધી ખેડૂતોએ રસ્તા પરથી હટીને દલિત પ્રેરણા સ્થળ પર જવું જોઈએ. ખેડૂત આગેવાનોએ આ વાત સ્વીકારી છે. તે દલિત પ્રેરણા સ્થળની અંદર ગયા છે.

ખેડૂતો એક સપ્તાહ સુધી દલિત પ્રેરણા સ્થળ પર રાહ જોશે

ગ્રેટર નોઈડા, નોઈડા યમુના ઓથોરિટીએ એક સપ્તાહનો સમય માગ્યો છે. એક સપ્તાહમાં ખેડૂતોના પ્રશ્નોનું નિરાકરણ આવશે. ખેડૂતો સાથે વાતચીત દરમિયાન યમુના ઓથોરિટીના OSD શૈલેન્દ્રસિંહ, નોઈડા ઓથોરિટીના ACEO મહેન્દ્ર પ્રસાદ અને પોલીસ-પ્રશાસનના અધિકારીઓ હાજર હતા. ઓથોરિટીના અધિકારીઓની સલાહ બાદ ખેડૂતો એક સપ્તાહ સુધી દલિત પ્રેરણા સ્થળ પર રાહ જોશે. જો એક સપ્તાહમાં આ મામલે સહમતિ નહીં બને તો તમામ ખેડૂતો દિલ્હી તરફ કૂચ કરશે.

સુરક્ષા માટે 5 હજાર જવાનોને તહેનાત કરવામાં આવ્યા

અગાઉ ખેડૂતોના આંદોલનને ધ્યાનમાં રાખીને સુરક્ષા માટે 5 હજાર જવાનોને તહેનાત કરવામાં આવ્યા હતા. પીએસીના 1 હજાર જવાનો તહેનાત. જળ તોપો, વજ્ર વાહનો, ટીયર ગેસ, પરિસ્થિતિને કાબૂમાં રાખવા માટે જરૂરી તમામ સાધનો તહેનાત કરવામાં આવ્યા હતા. નોઈડા પોલીસના એડિશનલ કમિશનર લો એન્ડ ઓર્ડર શિવ હરીએ કહ્યું હતું કે, લોકો ટ્રાફિકમાં ફસાય ન જાય તેની ખાતરી કરવા માટે, વૈકલ્પિક માર્ગો સાથે ડાયવર્ઝન રૂટ અને એડવાઈઝરી જારી કરવામાં આવી હતી.

શું છે ખેડૂતોની માગ?

હકિકતમાં, કેટલાક ખેડૂત સંગઠનોએ કહ્યું હતું કે, તેઓ મહામાયા ફ્લાયઓવર થઈને દિલ્હી જશે અને સંસદનો ઘેરાવ કરશે. ખેડૂતોનું કહેવું છે કે, તેમની માગણીઓ સ્વીકારવામાં આવી નથી અને તેઓ લાંબા સમયથી વિવિધ સત્તાવાળાઓ સામે વિરોધ કરી રહ્યા હતા. રવિવારે પણ કેટલાક કલાકોની વાતચીત નિષ્ફળ રહી હતી, ત્યારબાદ ખેડૂતોએ દિલ્હી કૂચ કરવાનો નિર્ણય લીધો હતો. ખેડૂતોની કુલ પાંચ મુખ્ય માંગણીઓ છે, જેમાં વળતરમાં વધારો તેમજ અધિકૃત જમીનમાંથી 10% વિકસિત જમીન આપવાની મુખ્ય માગણીઓ છે.