ચોમાસાના વિધિવત આગમનની ઘડીઓ ગણાઈ રહી છે ત્યારે રાજકોટના બેડી સ્થિત સરદાર વલ્લભભાઇ પટેલ માર્કેટ યાર્ડ ખાતે આજે મગફળી અને તલ સહિતની જણસીઓ વેંચવા માટે ખેડૂતો ઉમટી પડ્યા હતા. રાજકોટ, લોધિકા અને પડધરી તાલુકાના ૧૮૦ ગામોના ખેડૂતોના ૬૦૦ વાહનોને યાર્ડમાં એન્ટ્રી અપાઇ હતી.

વિશેષમાં રાજકોટ યાર્ડના વેપારી વર્તુળોએ જણાવ્યું હતું કે મગફળીમાં બિયારણની ખરીદીને લઈ ધૂમ ડિમાન્ડ નીકળતા મગફળીની ૭૫૦૦૦ મણ, નવા સફેદ ઉનાળુ તલની ૪૪,૦૦૦ મણ અને મેથીની ૨૦,૦૦૦ મણની આવક થઇ હતી. તમામ જણસીઓ ભરેલા વાહનોને માર્કેટ યાર્ડમાં ક્રમવાર પ્રવેશ આપી ઉતરાઈ કરાવવામાં આવી હતી. રાજકોટ માર્કેટ યાર્ડના ચેરમેન જયેશભાઇ બોઘરા તથા ડિરેક્ટરો સહિતના સ્ટાફ દ્વારા ઉતરાઇની વ્યવસ્થા કરવામાં આવી હતી.