સમગ્ર સૌરાષ્ટ્ર અને કચ્છ વિસ્તારને આવરી લેતી રાજ્યની ચાર વીજ વિતરણ કંપનીઓમાં સૌથી મોટી પશ્ચિમ ગુજરાત વીજ કંપની લિમિટેડમાં 2024- 25 ના વર્ષ દરમિયાન કુલ 63,198 સ્થળેથી રૂ. 271.01 કરોડની પાવર ચોરી ઝડપાઈ જવા પામે છે. જેમાં ભાવનગર સર્કલમાં સૌથી વધુ 8,174, ત્યારબાદ બીજા નંબરે જામનગર સર્કલમાં 7,350 અને ત્રીજા નંબરે અમરેલી સર્કલમાં 7,188 પાવરચોરી ઝડપાઈ જવા પામી છે.જ્યારે સુરેન્દ્રનગર સર્કલમાં 5,625, રાજકોટ ગ્રામ્યમાં 5,596 ને શહેર સર્કલમાં 5005 વીજ ચોરી સાથે ચોથા, પાંચમા અને છઠ્ઠા સ્થાને રહ્યા છે.

ઉર્જા વિકાસ નિગમના અધિક પોલીસ મહાનિર્દેશક રાજકુમાર પાંડિયન તેમજ પીજીવીસીએલના મેનેજિંગ ડાયરેક્ટર પ્રીતિ શર્માના માર્ગદર્શન હેઠળ સૌરાષ્ટ્ર કચ્છમાં પીજીવીસીએલ દ્વારા ૨૦૨૪- ૨૫ના નાણાંકીય વર્ષમાં વીજ ચેકિંગની કામગીરી દરમ્યાન સૌરાષ્ટ્ર-કચ્છની ૧૨ વર્તુળ કચેરીના અધિક્ષક ઇજનેરો અને વિભાગીય કચેરીના કાર્યપાલક ઇજનેરોની રાહબરી અને સીધી દેખરેખ હેઠળ એપ્રિલ-૨૦૨૪થી માર્ચ-૨૦૨૫ દરમ્યાન કુલ ૪,૭૪,૩૪૭ વીજ જોડાણો ચેક કરવામાં આવેલ જેમાંથી કુલ ૬૩,૧૯૮ વીજ જોડાણોમાં અંદાજીત રકમ રૂ. ૨૭૧.૦૧ કરોડના પુરવણી બિલો ફટકારવામાં આવ્યા હતા. સદરહુ વીજચોરીમાં પકડાયેલા ગ્રાહકો/બિનગ્રાહકો સામે વીજ કંપનીના પોલીસ સ્ટેશન દ્વારા વીજચોરીનો ગુનો દાખલ કરી વીજચોરો સામે કડક કાયદાકીય કાર્યવાહી કરવામાં આવી છે.

૧ કરોડથી ૨.૪૨ કરોડની પાવરચોરીના પાંચ કિસ્સા

૨૦૨૪-૨૫ના વર્ષ દરમિયાન પાવરચોરીનું રૂ.૧ કરોડથી વધુ રકમનું બિલ આપવામાં આવ્યું હોય તેવા ગ્રાહકોમાં (૧) ભચાઉ તાલુકાના માનફરા ગામના સિલિકા મેન્યુફેક્ચરિંગ યુનિટના વીજજોડાણમાં મીટર બાયપાસ કરી વીજ વપરાશ કરતા માલૂમ પડતાં રૂ. ૧.૬૫ કરોડનું બિલ (૨) ટંકારા તાલુકાના વાઘગઢ ગામમાં ઓઈલ ઇન્ડ.ના ઔદ્યોગિક હેતુના યુનિટમાં ટર્મિનલ સીલ સાથે ચેડાં કરી વીજચોરી થયાનું માલૂમ પડતાં રૂ. ૧.૧૬ કરોડનું બિલ (૩) કોટડાસાંગાણી તાલુકાના વેરાવળ ગામના એન્જિનિયરીંગ વર્ક્સ યુનિટમાં મેગ્નેટનો ઉપયોગ કરીને વીજચોરી થતી હોવાનું માલૂમ પડતાં રૂ. ૧.૧૫ કરોડનું બિલ (૪) ગોંડલ તાલુકાના શેમળા ગામમાં સ્પિનિંગ મિલનું મીટર શંકાસ્પદ જણાતાં લેબોરેટરીમાં તપાસ અર્થે મોકલાતાં મીટર ધીમું ફરતું હોવાનું માલૂમ પડતાં રૂ. ૨.૪૧ કરોડનું બિલ તેમજ (૫) વાંકાનેર તાલુકાના લક્કડધાર ગામના ટાઈલ્સના યુનિટમાં મીટર ધીમું ફરતું હોવાનું માલૂમ પડતાં રૂ. ૨.૧૩ કરોડનું પૂરવણી બિલ આપવામાં આવ્યું હતું.

વીજ ચોરીની માહિતી આપનાર નાગરિકનું નામ ગુપ્ત રખાતું હોવાનો દાવો

જો કોઈ સ્થળે વીજચોરી થતી હોવાની જાણ થાય તો જાગૃત નાગરીકો આ માટેના ખાસ મોબાઈલ નંબર ૯૯૨૫૨ ૧૪૦૨૨ ઉપર પોતાની ફરિયાદ લખાવી શકે છે. એટલું જ નહિ પીજીવીસીએલની વેબસાઈટ www.pgvcl.com મારફતે પણ આ અંગેની ફરિયાદ મોકલી શકે છે. માહિતી આપનારનું નામ તેમજ અન્ય વિગતો તદ્દન ગુપ્ત રાખવામાં આવતી હોય છે.