અન્ય એક ફરિયાદમાં આરોપી શખ્સની તપાસમાં અંગ્રેજીમાં લખેલો સર્ટીફીકેટ ઓફ પ્રોટોકોલ નો લેટર મળી આવ્યો હતો. જે ઓફિસ ટુ એડિશનલ ડિસ્ટ્રીક મેજિસ્ટ્રેટ એન્ડ રેસિડેન્ટ એડિશનલ કલેક્ટર - રાજકોટનો હતો. જેનો ઉપયોગ તે તેની કિયા કારના સરકારી ઉપયોગ માટે કરતો હતો આ લેટર પણ તેણે બોગસ બનાવ્યો હતો. 


આ સાથે નોંધાયેલી અન્ય એક ફરિયાદમાં જણાવાયું છે કે ગત તારીખ ૨૨ માર્ચના રોજ આરોપી જીલ પંચમતીયા રાજકોટ ખાતે રહેતા કેતનભાઈ રમેશચંદ્ર દેસાઈના ઘરે ગયો હતો. ત્યાં તેની કારમાં કમિશનર (રેવન્યુ સર્વિસ) લખેલી ગાંધીનગરના સરકારી નંબરની પાસિંગની કારમાં તે આવ્યો હતો. અહીં આવીને તેણે નંબર પ્લેટ બદલાવીને જી.જે. ૩૭ એમ. ૨૮૧૬ લગાવી દીધી હતી. ત્યાર બાદ અગાઉની બે નંબર પ્લેટ કારમાં મૂકીને તે કેબ બુક કરાવીને ખંભાળિયા નીકળી ગયો હતો. 


પોલીસ તપાસમાં ઉપરોક્ત ગાડીમાં પોલીસના વાહનમાં વાગે તેવું સાયરન પણ કાર્યરત હતું અને આ કારમાંથી અન્ય રજીસ્ટ્રેશન નંબર વાળી બે નંબર પ્લેટ, નેમ પ્લેટ તેમજ આવા બોગસ દસ્તાવેજો પોલીસને હાથ લાગ્યા છે.


રિમાન્ડ દરમિયાન પોલીસને તેના મકાનમાંથી મેગેઝીન સાથેની પિસ્તોલ અને સાત નંગ છરા મળી આવ્યા હતા. તેની કિંમત રૂ. ૨૦,૦૦૦ દર્શાવવામાં આવી છે. આ ઉપરાંત આ સ્થળેથી અધિક પોલીસ મહાન નિર્દેશકની કચેરી સીઆઈડી (ક્રાઈમ અને રેલ્વે) ગાંધીનગરનો વર્ષ ૨૦૨૦ નો પત્ર પણ મળી આવ્યો હતો. આ પ્રકરણમાં પોલીસે જીલ પંચમતીયા સામે આર્મ્સ એક્ટ હેઠળ પણ ગુનો દાખલ કર્યો છે.


જીલ પંચમતીયા પાસે કોઈ ઉચ્ચ ડીગ્રી કે અભ્યાસ ન હોવા છતાં પણ તે ક્લાસ વન ઓફિસર તેમજ ડોક્ટર જેવો હોદો દર્શાવતો હતો. આરોપી શખ્સની આ ક્રાઈમ કુંડળી સંદર્ભે પોલીસે તેની સામે નકલી દસ્તાવેજના બે કેસ, નકલી આઈ-કાર્ડના બે કેસ, બે સરકારી અલગ અલગ હોદ્દા અને અલગ અલગ વાહનના બે કેસ, હથિયાર ધારાનો એક કેસ તેમજ છેતરપિંડીનો એક કેસ દાખલ કર્યો છે. 
​​​​​​​
આ સમગ્ર પ્રકરણમાં આગળની તપાસ અહીંના પી.આઈ. સી.એલ. દેસાઈના માર્ગદર્શન હેઠળ પી.એસ.આઈ. બારડ દ્વારા ચલાવવામાં આવી રહી છે. આ ચર્ચાસ્પદ બની ગયેલા ગુના સંદર્ભે ખંભાળિયા પોલીસ મથકના પી.આઈ. બી.જે. સરવૈયા, સી.એલ. દેસાઈ અને કે.એસ. ગોહિલ સાથે પી.એસ.આઈ. એમ.આર. બારડ સાથે સ્ટાફના દિપકભાઈ રાવલિયા, હેમતભાઈ નંદાણીયા, પ્રવીણભાઈ ગોજીયા, હમીરભાઈ ચાવડા, યોગરાજસિંહ ઝાલા, સાજણભાઈ સુવા, ભરતભાઈ જમોડ, કાનાભાઈ લુણા સહિતના સ્ટાફ દ્વારા તપાસ કાર્યવાહી કરવામાં આવી હતી. ​​​​​​​



નકલી સ્ટેમ્પ તેમજ ભારત સરકારના બનાવટી દસ્તાવેજો પણ તૈયાર કર્યા..!! ​​​​​​​

ખંભાળિયામાં રહેતા જીલ ભરતભાઈ પંચમતીયાની તપાસમાં તેના રામનાથ ખાતેના રહેણાક મકાનેથી

(૧) એસડીએમ લખેલ લાલ કલરની પ્લેટ તથા
(૨)   ગવર્મેન્ટ ઓફ ઇન્ડીયા સુપ્રીટેન્ડન્ટ ઇમરજન્સી ડીવીઝન લખેલું લાલ કલરનું બોર્ડ તથા
(૩) ડો. જીલ પંચમતીયા કમિશનરેટ ઓફ મેડીકલ એજયુકેશન લખેલું બોર્ડ,
(૪) ડો. જીલ પંચમતીયા-ફીઝીયોલોજી હેડ ડીપાર્ટમેન્ટ લખેલ ટેબલ નેમ પ્લેટ
(૫) ગુજરાત મેડીકલ કાઉન્સીલીંગનુ તેમના નામનુ સર્ટીફિકેટ
(૬) એક જે.બી. પંચમતીયાના નામે એડી. કલેકટર અને એડી. ડીસ્ટ્રીક્ટ મેજીસ્ટ્રેટ - રાજકોટ દ્વારા ઇશ્યુ કરેલો જાહેર પરિપત્ર
૭) એડી. ડીસ્ટ્રીક્ટ મેજીસ્ટ્રેટ, રાજકોટ દ્વારા જે.બી. પંચમતીયાને ઇશ્યુ કરેલ પ્રોટોકોલ સર્ટીફિકેટ
૮) ભારત સરકાર આપાતકાલીન વિભાગ સ્વાસ્થય અને મેડિકલ વિભાગનું ડો. જીલ પચમંતીયાના નામનુ ફોટો વાળુ ઓળખ કાર્ડ
(૯) ગુજરાત સરકારનુ મિનીસ્ટ્રી ઓફ હેલ્થ ફેમીલી વેલ્ફેરનુ ડો. જીલ પચમંતીયાના નામનું ફોટો વાળુ ઓળખ કાર્ડ
૧૦) એડી. કલેક્ટર એન્ડ એડી. ડીસ્ટ્રીક્ટ મેજીસ્ટ્રેટ (એ.ડી.એમ) ના હોદ્દા વાળું ઓળખકાર્ડ
(૧૧) ગવર્મેન્ટ ઓફી ઇન્ડીયા ઇમરજન્સી ડીવીઝન હેલ્થ એન્ડ મેડીસન ડીપાર્ટમેન્ટ, વિભાગ દ્વારા ઓથોરાઇઝ પરમિશન લેટર,
(૧૨) એડીડી મેજી. એન્ડ રેસી. એડી. કલેકટર રાજકોટ દ્વારા ઇસ્યુ   લેટર
(૧૩) એક ગ્લોક પિસ્ટલ જેવી દેખાતી એઇર પિસ્ટલ મળી આવેલ,
(૧૪) આરોપીની માલિકીની કીયા કાર રજી.નં. જીજે૩૭એમ- ૨૮૧૬ની જે કારમાં સાથે સરકારી વાહનોમાં લાગતી હોય તેવી સીરીઝની રજી. નંબર જીજે૧૮જીબી-૯૬૬૯ની બનાવટી નંબર પ્લેટ તથા લખેલ બોર્ડ મળી આવ્યા હતા.

આ ઉપરાંત અલગ અલગ વિભાગોના સ્ટેમ્પ(સીક્કા) મળી આવતાં આ અંગે આરોપીની પુછપરછ દરમ્યાન આ ઉપરોકત વિગતે જે ચીજવસ્તુ તથા દસ્તાવેજી રેકર્ડ મળી આવેલ તે તમામ બનાવટી છે. અને તેઓ પોતે આવો કોઇ હોદ્દો પણ ધરાવતા નહી હોવાની હકિકત તેણે પોલીસ સમક્ષ કબૂલી હતી.


​​​​​​​અધિકારીઓ, નેતાઓ સાથે ફોટા પડાવી પોતાનું સન્માન દર્શાવતો

આ સમગ્ર પ્રકરણમાં તબક્કાવાર મળેલી માહિતી આપતા ડીવાયએસપી હાર્દિક પ્રજાપતિએ જણાવ્યું હતું કે આરોપી જીલએ સ્માર્ટનેસ વાપરીને અલગ અલગ જગ્યાએ પોતાની એડિશનલ કલેક્ટર, હોસ્પિટલના ડીન, એડિશનલ કલેક્ટર - રાજકોટ વિગેરેની ઓળખ આપી અને તે મીટીંગ કરતો હતો.


આટલું જ નહીં, ઉચ્ચ અધિકારીઓ તેમજ મોટા નેતાઓ સાથે શુભેચ્છા મુલાકાતના નામે તે ફોટા પડાવી લેતો અને આ ફોટાની પ્રિન્ટ કરાવી તેનું કલેક્શન બનાવી, અને તેના ઘરે તેમજ ઓફિસે રાખી અને તેનો ઉપયોગ મીટીંગ તેમજ તેના થયેલા સન્માન માટે થયું હોવાનું જણાવવા માટે કરતો હતો.