વૈશ્વિક અર્થતંત્રની સાથે ભારત માટે પણ ખરાબ સમાચાર સામે આવ્યા છે. આંતરરાષ્ટ્રીય નાણાકીય ભંડોળ એ ભારતના આર્થિક વિકાસ દરના અંદાજમાં ઘટાડો કર્યો છે. આઈએમએફના એપ્રિલ 2025ના વર્લ્ડ ઇકોનોમિક આઉટલુક રિપોર્ટ અનુસાર, ભારતનો જીડીપીવૃદ્ધિ દર હવે 2025માં 6.2 ટકા રહેવાનો અંદાજ છે, જે અગાઉ જાન્યુઆરી 2025ના રિપોર્ટમાં 6.5 ટકા જણાવવામાં આવ્યો હતો. આઈએમએફના મતે, વધતી જતી વૈશ્વિક અનિશ્ચિતતા અને નવી યુએસ વેપાર નીતિઓ, ખાસ કરીને રાષ્ટ્રપતિ ડોનાલ્ડ ટ્રમ્પ દ્વારા લાદવામાં આવેલા ટેરિફને કારણે આ સુધારો કરવામાં આવ્યો છે.

અહેવાલમાં જણાવાયું છે કે ભારતની આર્થિક સ્થિતિ પ્રમાણમાં સ્થિર રહે છે, જેનું મુખ્ય કારણ ગ્રામીણ વિસ્તારોમાં ખાનગી વપરાશમાં વધારો છે. જોકે, વૈશ્વિક વેપાર તણાવ અને અનિશ્ચિતતાઓએ ભારતના સંભવિત વિકાસને અસર કરી છે, જેના કારણે વિકાસ દરમાં 0.3 ટકાનો ઘટાડો થયો છે.આઈએમએફએ માત્ર ભારત માટે જ નહીં પરંતુ સમગ્ર વૈશ્વિક અર્થતંત્ર માટે વૃદ્ધિ આગાહીમાં મોટો ઘટાડો કર્યો છે. હવે 2025 માં વૈશ્વિક જીડીપી વૃદ્ધિ માત્ર 2.8 ટકા રહેવાની ધારણા છે, જે અગાઉના અંદાજો કરતા અડધો ટકા ઓછો છે.

અમેરિકા અને ચીનને પણ નુકસાન થશે

અમેરિકાનો વિકાસ દર 2.7 ટકાથી ઘટાડીને 1.8 ટકા કરવામાં આવ્યો છે, જ્યારે ચીનનો GDP વૃદ્ધિ દર હવે 4.6 ટકાથી ઘટાડીને 4.0 ટકા કરવાનો અંદાજ છે. આઈએમએફ એ એમ પણ કહ્યું કે 2026 માટે ચીનનો વિકાસ દર 4.5 ટકાથી ઘટાડીને 4.0 ટકા કરવામાં આવ્યો છે. આઈએમએફના રિપોર્ટમાં સ્પષ્ટ ચેતવણી આપવામાં આવી છે કે છેલ્લા કેટલાક મહિનામાં અમેરિકા દ્વારા સતત જાહેર કરાયેલા ટેરિફ અને વેપાર નીતિઓમાં ઝડપી ફેરફારો વૈશ્વિક અર્થતંત્ર માટે મોટો ખતરો ઉભો કરી રહ્યા છે. રિપોર્ટમાં કહેવામાં આવ્યું છે કે દુનિયા છેલ્લા 80 વર્ષથી ચાલી આવતી આર્થિક વ્યવસ્થામાંથી બહાર નીકળી રહી છે. જૂના નિયમોને પડકારવામાં આવી રહ્યા છે અને નવા નિયમો હજુ અસ્તિત્વમાં આવ્યા નથી.

ભારતે સંતુલન જાળવવાની જરૂર

ભારતના સંદર્ભમાં,આઈએમએફ એ ભાર મૂક્યો હતો કે સ્થાનિક માંગ અને ગ્રામીણ અર્થતંત્રમાં થોડી સ્થિરતા હોવા છતાં, વૈશ્વિક અનિશ્ચિતતાઓનો સામનો કરવા માટે સતર્ક રહેવાની જરૂર છે. આવનારા સમયમાં, ભારતે તેની આર્થિક નીતિઓને સંતુલિત કરતી વખતે વૈશ્વિક પરિસ્થિતિઓને ધ્યાનમાં રાખવી પડશે.