શહેરમાં પૂરપાટ ઝડપે અને દારૂ પી વાહન ચલાવનાર શખસો છાસવારે સામાન્યથી લઇ જીવલેણ અકસ્માત સર્જી રહ્યા છે ત્યારે વધુ એક આવી ઘટના સામે આવી છે. શહેરના કાલાવડ રોડ પર તાલુકા પોલીસ સ્ટેશન નજીક મટુકી રેસ્ટોરન્ટ પાસે રાત્રિના નશાની હાલતમાં કાર ચલાવનાર ડી.જે. સંચાલકે કાબુ ગુમાવી કોર્પોરેશનની ગાડી સાથે અકસ્માત સર્જ્યો હતો. અકસ્માત બાદ કાર ચાલકે ભાગી જવાની કોશિશ કરી હતી પરંતુ તેણે ચિક્કાર નશો કર્યો હોય તે ચાલી પણ શકતો ન હતો. અહીં લોકો એકત્ર થયા હોય તેણે તેને ઝડલી લીધો હતો. દરમિયાન પોલીસ પણ આવી ગઈ હતી આ ઘટના અંગે કોર્પોરેશનના લાઈવ સ્ટોક ઇન્સ્પેક્ટરની ફરિયાદ પરથી તાલુકા પોલીસે ગુનો નોંધી કાયદેસરની કાર્યવાહી કરી હતી.

જાણવા મળતી વિગતો મુજબ, ગઇકાલ રાત્રિના કાલાવડ રોડ પર તાલુકા પોલીસ સ્ટેશન પાસે મટુકી રેસ્ટોરન્ટ નજીક કાર નંબર જીજે 14 બીડી 3604 ના ચાલકે આગળ જઈ રહેલી રાજકોટ કોર્પોરેશનની કાર સાથે અકસ્માત સર્જ્યો હતો. બનાવના પગલે અહીં લોકો એકત્ર થઈ ગયા હતા. અકસ્માત સર્જનાર આ કારચાલક ઘટના બાદ ભાગી જવાની કોશિશ કરી હતી પરંતુ તેણે ચિક્કાર નશો કર્યો હોય તે ચાલી પણ શકતો ન હોય અહીં એકત્ર થયેલા લોકોએ તેને પકડી લીધો હતો. દરમિયાન તાલુકા પોલીસનો સ્ટાફ પણ અહીં પહોંચી ગયો હતો અને જરૂરી કાર્યવાહી કરી હતી.

વધુમાં જાણવા મળતી વિગતો મુજબ, આ ઘટના અંગે મોરબીના સનાળા રોડ પર નીતિન પાર્કમાં રહેતા અને રાજકોટ કોર્પોરેશનમાં લાઈવ સ્ટોક ઇન્સ્પેક્ટર તરીકે ફરજ બજાવનાર પંકજભાઈ પ્રભુભાઈ દેત્રોજા(ઉ.વ 33) દ્વારા ફરિયાદ નોંધાવવામાં આવી છે. જેમાં આરોપી તરીકે ટાટા પંચ કાર નંબર જીજે 14 બીડી 3604 ના ચાલક પિયુષ મહેન્દ્રભાઈ લેઉવા(ઉ.વ 33 રહે. રંગોલી પાર્ક હાઉસિંગ બોર્ડ કવાર્ટર નંબર જી 1004 નું નામ આપ્યું છે. કારચાલક પિયુષ ડી.જે. સંચાલક હોવાનું માલુમ પડ્યું છે. રાત્રિના તે ચિક્કાર નશો કરી કાર લઇ નીકળ્યો હતો દરમિયાન કાબૂ ગુમાવતા કોર્પોરેશનના વાહન સાથે આ અકસ્માત સર્જ્યો હતો. જેમાં કોર્પોરેશનના વાહનમાં અંદાજિત રૂપિયા ૪૦ હજારનું નુકસાન થયું હતું. જે અંગે પોલીસે આરોપી સામે ગુનો નોંધી જરૂરી કાર્યવાહી કરી છે.