અમેરિકી રાષ્ટ્રપતિ ડોનાલ્ડ ટ્રમ્પે હોર્મુઝની સામુદ્રધુની (Strait of Hormuz) પર ઈરાનના કબજા અને ત્યાંથી તેલ પુરવઠો રોકવા બદલ આક્રમક વલણ અપનાવ્યું છે. ટ્રમ્પે ઈરાનને સ્પષ્ટ ચેતવણી આપી છે કે જો 7 એપ્રિલ સુધીમાં હોર્મુઝનો રસ્તો તમામ જહાજો માટે ખોલવામાં નહીં આવે, તો અમેરિકા ઈરાન પર એવો વળતો પ્રહાર કરશે જેનાથી 'ભારે તબાહી' સર્જાશે.

શું છે ટ્રમ્પનું અલ્ટીમેટમ?
ટ્રમ્પે વોશિંગ્ટન ખાતે પત્રકારો સાથેની વાતચીતમાં જણાવ્યું હતું કે, ઈરાને વૈશ્વિક અર્થતંત્રને બંધક બનાવવાનો પ્રયાસ કર્યો છે જેને લાંબો સમય સહન કરી શકાય તેમ નથી. ટ્રમ્પે કહ્યું કે, "અમારી પાસે તમામ વિકલ્પો ખુલ્લા છે. જો 7 એપ્રિલ સુધીમાં આ મહત્વપૂર્ણ જળમાર્ગ નહીં ખોલાય, તો ઈરાને તેની કિંમત ચૂકવવી પડશે. આ કોઈ સામાન્ય ચેતવણી નથી, પણ છેલ્લી તક છે."

​​​​​​​હોર્મુઝનું વ્યૂહાત્મક મહત્વ
હોર્મુઝની સામુદ્રધુની એ વિશ્વના સૌથી મહત્વપૂર્ણ તેલ માર્ગોમાંનો એક છે. વિશ્વના કુલ તેલ પુરવઠાનો અંદાજે 20% થી વધુ હિસ્સો આ સાંકડા માર્ગેથી પસાર થાય છે. ઈરાને આ માર્ગ પર પોતાનું વર્ચસ્વ જમાવીને અમેરિકા અને તેના સાથી દેશોના તેલ જહાજોને રોકવાની ધમકી આપી છે. જો આ માર્ગ લાંબો સમય બંધ રહે, તો વિશ્વભરમાં પેટ્રોલ અને ડીઝલના ભાવ આસમાને પહોંચી શકે છે.