હરિયાણા સરકારે કર્મચારીઓને દિવાળીની ભેટ આપી છે. સરકારે કર્મચારીઓ અને નિવૃત્ત કર્મચારીઓના મોંઘવારી ભથ્થામાં વધારો કર્યો છે. મોંઘવારી ભથ્થું 50 ટકાથી વધારીને 53 ટકા કરવામાં આવ્યું છે. આ સંદર્ભમાં નાણાં વિભાગના અધિક મુખ્ય સચિવ અનુરાગ રસ્તોગી દ્વારા આદેશ જારી કરવામાં આવ્યો છે.

હરિયાણા સરકારે દિવાળીના અવસર પર કર્મચારીઓ અને પેન્શનરોને ભેટ આપી છે. રાજ્ય સરકારે મોંઘવારી ભથ્થા (DA)માં 3% વધારાની જાહેરાત કરી છે. હવે કર્મચારીઓને 50%ની જગ્યાએ 53% મોંઘવારી ભથ્થુ મળશે. આ વધારો 1 જુલાઈ, 2024થી લાગુ થશે.

કેરળ સરકારે પણ કર્મચારીઓને દિવાળીની ભેટ આપી

કેરળ સરકારે આજે રાજ્ય સેવા કર્મચારીઓ અને શિક્ષકોને મોંઘવારી ભથ્થાના હપ્તાને પણ મંજૂરી આપી હતી. નાણામંત્રીએ પેન્શનરો માટે મોંઘવારી રાહત (DR)ના હપ્તાને મંજૂરી આપવાની પણ જાહેરાત કરી છે. મંત્રીએ કહ્યું કે વધેલા DA અને DRનો લાભ UGC, AICTE અને તબીબી સેવાઓ સહિત તમામ ક્ષેત્રોમાં ઉપલબ્ધ થશે. આ રીતે રાજ્યના વાર્ષિક ખર્ચમાં અંદાજે 2 હજાર કરોડ રૂપિયાનો વધારો થવાની સંભાવના છે.

છત્તીસગઢ સરકારે પણ કર્મચારીઓને ભેટ આપી

તાજેતરમાં છત્તીસગઢ સરકારે દિવાળીની ભેટ તરીકે રાજ્યના કર્મચારીઓને મોંઘવારી ભથ્થામાં પણ વધારો કર્યો હતો. સીએમ વિષ્ણુ દેવ સાઈએ કર્મચારીઓ માટે મોંઘવારી ભથ્થામાં 4 ટકા વધારો કરવાની જાહેરાત કરી હતી. આ રીતે છત્તીસગઢમાં સરકારી કર્મચારીઓનો DA વધીને 50 ટકા થઈ ગયો છે.