ભારતીય ક્રિકેટ ટીમના ભૂતપૂર્વ વિકેટકીપર બેટ્સમેન દિનેશ કાર્તિકે અચાનક જાહેરમાં માફી માંગવી પડી. કાર્તિકે કહ્યું કે  ભાઈ, મોટી ભૂલ થઈ ગઈ છે. પૂર્વ ભારતીય કેપ્ટન એમએસ ધોની સાથે જોડાયેલી એક બાબત પર કાર્તિકે બધાની સામે માફી માંગવી પડી હતી. માફી માગ્યા બાદ કાર્તિકે કહ્યું કે મને મારી ભૂલનો પછી ખ્યાલ આવ્યો.

કાર્તિકે ત્રણેય ફોર્મેટ માટે ભારતીય ટીમની ઓલ ટાઈમ ઈલેવનની પસંદગી કરી હતી. કાર્તિકે 'ક્રિકબઝ'ના એક શોમાં આ ટીમની પસંદગી કરી હતી. જો કે કાર્તિકે એમએસ ધોનીને તેની ઈલેવનમાં સામેલ કર્યો ન હતો.  જે તેને પછીથી સમજાયું અને પછી તેણે બધાની માફી માંગી કે તેણે ધોનીને તેની ઓલ ટાઈમ ઈન્ડિયા ઈલેવનમાં પસંદ કર્યો ન હતો.

કાર્તિકે તેની ભૂલ વિશે કહ્યું, "ભાઈઓ, તે એક ભૂલ હતી, સાચે જ તે એક મોટી ભૂલ હતી. જ્યારે એપિસોડ આવ્યો ત્યારે મને તેનો અહેસાસ થયો."

કાર્તિકે વધુમાં કહ્યું, "હું મારી પ્લેઈંગ ઈલેવનમાં વિકેટકીપરની પસંદગી કરવાનું ભૂલી ગયો હતો. રાહુલ દ્રવિડ ટીમમાં હતો. બધાને લાગતું હતું કે મેં પાર્ટ ટાઈમ વિકેટકીપર રાખ્યો છે પરંતુ વાસ્તવમાં મેં રાહુલ દ્રવિડને કીપર તરીકે રાખ્યો નથી. હું પોતે વિકેટકીપર હોવાને કારણે હું વિકેટકીપરને રાખવાનું ભૂલી ગયો હતો, આ એક મોટી ભૂલ છે.

ત્યારબાદ આગળ વાત કરતા કાર્તિકે ધોનીને ક્રિકેટ જગતના મહાન ખેલાડીઓમાંથી એક ગણાવ્યો હતો. આ સિવાય કાર્તિકે કહ્યું કે ધોની તેની ટીમ માટે તમામ ફોર્મેટમાં નંબર 7 પર રહેશે.

ધોની વિના દિનેશ કાર્તિકની પ્લેઈંગ ઈલેવન ટીમ કેવી હતી?

વિરેન્દ્ર સેહવાગ, રોહિત શર્મા, રાહુલ દ્રવિડ, સચિન તેંડુલકર, વિરાટ કોહલી, યુવરાજ સિંહ, રવિન્દ્ર જાડેજા, રવિચંદ્રન અશ્વિન, અનિલ કુંબલે, જસપ્રિત બુમરાહ, ઝહીર ખાન. 12મો ખેલાડી: હરભજન સિંહ.