મહાશિવરાત્રીના શુભ અવસર પર 45 દિવસીય મહાકુંભ 2025 પૂર્ણ થયો છે. છતાં ભક્તોએ પ્રયાગરાજના ત્રિવેણી સંગમમાં પવિત્ર સ્નાન માટે આવવાનું ચાલુ રાખ્યું છે. ગઈકાલે મુખ્યમંત્રી યોગી આદિત્યનાથે ટ્વિટર પર પોસ્ટ કરી કે માનનીય પ્રધાનમંત્રી નરેન્દ્ર મોદીના માર્ગદર્શન હેઠળ આયોજિત માનવતા, શ્રદ્ધા, એકતા અને સમાનતાનો મહાન તહેવાર મહાકુંભ-2025, પ્રયાગરાજ, આજે મહાશિવરાત્રીના પવિત્ર સ્નાન સાથે તેના સમાપન તરફ આગળ વધી રહ્યો છે.

યોગી આદિત્યનાથે વધુમાં માહિતી આપી હતી કે 2025ના મહાકુંભ દરમિયાન 66 કરોડ 21 લાખથી વધુ ભક્તોએ પવિત્ર ત્રિવેણીમાં પવિત્ર ડૂબકી લગાવી હતી. મુખ્યમંત્રીએ કહ્યું કે વિશ્વના ઇતિહાસમાં આ અભૂતપૂર્વ - અવિસ્મરણીય ઘટના હતી. આ પૂજ્ય અખાડાઓ, સંતો, મહામંડલેશ્વરો અને ધાર્મિક ગુરુઓના પવિત્ર આશીર્વાદનું પરિણામ છે કે સંવાદિતાનો આ મહાસંગમ દિવ્ય અને ભવ્ય બની રહ્યો અને સમગ્ર વિશ્વને એકતાનો સંદેશ આપી રહ્યો છે.

નાયબ મુખ્યમંત્રી કેશવ પ્રસાદ મૌર્યએ પણ પ્રધાનમંત્રી મોદી અને મુખ્યમંત્રી યોગી આદિત્યનાથના નેતૃત્વમાં કુંભની ઐતિહાસિક સફળતાની પ્રશંસા કરી અને ત્રિવેણી સંગમમાં એકઠા થયેલા લાખો લોકોનો આભાર માન્યો. મૌર્યએ કહ્યું હતું કે આજે મહાશિવરાત્રીના દિવસે, મહાકુંભ 2025 આધ્યાત્મિક એકતા, દૈવી ઉર્જા અને અલૌકિક મહત્વ સાથે પૂર્ણ થયો છે. 144 વર્ષ પછી મહાકુંભ દેશ અને વિદેશમાં આકર્ષણનું કેન્દ્ર બન્યો. પીએમ મોદીના સક્ષમ માર્ગદર્શન હેઠળ, મુખ્યમંત્રી યોગીના નેતૃત્વમાં મહાકુંભને સુચારુ રીતે ચલાવવા માટે તમામ પગલાં લેવામાં આવ્યા હતા.

મહા કુંભ મેળો પોષ પૂર્ણિમા (13 જાન્યુઆરી) ના રોજ પ્રથમ અમૃત સ્નાન સાથે શરૂ થયો હતો અને 26 ફેબ્રુઆરીના રોજ સત્તાવાર રીતે પૂર્ણ થયો હતો. આ ઉપરાંત મકરસંક્રાંતિ (14 જાન્યુઆરી), મૌની અમાવસ્યા (29 જાન્યુઆરી), વસંત પંચમી (3 ફેબ્રુઆરી) અને માઘી પૂર્ણિમા (12 ફેબ્રુઆરી) ના રોજ મોટી સંખ્યામાં ભક્તોએ પ્રયાગરાજ ખાતે સંગમમાં પવિત્ર ડૂબકી લગાવી હતી. ત્યારે આજે સવારે પણ ઘણા ભક્તો સ્નાન કરવા માટે સંગમ પહોંચ્યા હતા. કેટલાક સંતો કહે છે કે મહાકુંભ 27 ફેબ્રુઆરીના રોજ બ્રહ્મ મુહૂર્ત સાથે સમાપ્ત થયો હતો. કદાચ આ જ કારણસર આજે સવારે ઘણા ભક્તો સ્નાન કરવા માટે ત્રિવેણી સંગમ પહોંચ્યા હતા.