બાળકોના ભવિષ્ય અને માનસિક સ્વાસ્થ્યને ધ્યાનમાં રાખીને, ડેનિશ સરકારે એક મોટું પગલું ભરવાનું નક્કી કર્યું છે. હકીકતમાં, તાજેતરમાં આ દેશની સરકારે જાહેરાત કરી છે કે તે ટૂંક સમયમાં 7 થી 17 વર્ષની વયના બાળકો માટે શાળાઓ અને શાળા પછીના ક્લબોમાં મોબાઇલ ફોન અને ટેબ્લેટના ઉપયોગ પર સંપૂર્ણ પ્રતિબંધ લાદશે.આ નિર્ણય એક સરકારી કમિશનની ભલામણ બાદ લેવામાં આવ્યો છે, જેમાં જાણવા મળ્યું છે કે મોબાઇલ અને સોશિયલ મીડિયા નાના બાળકો પર ખૂબ જ ખરાબ અસર કરી રહ્યા છે. કમિશને સ્પષ્ટપણે કહ્યું છે કે ૧૩ વર્ષથી ઓછી ઉંમરના બાળકો પાસે પોતાનો સ્માર્ટફોન કે ટેબ્લેટ ન હોવો જોઈએ.

શાળાઓ મોબાઇલ ફ્રી ઝોન બનશે

સરકાર હવે કાયદામાં ફેરફાર કરી રહી છે જેથી દેશની તમામ 'ફોલ્કેસ્કોલ' એટલે કે પ્રાથમિક અને નિમ્ન માધ્યમિક શાળાઓને મોબાઇલ-મુક્ત ઝોન બનાવી શકાય. આનો અર્થ એ થયો કે 7 થી 17 વર્ષની વયના બાળકોને શાળામાં મોબાઇલ ફોન લાવવાની મંજૂરી આપવામાં આવશે નહીં. ન તો વર્ગ દરમિયાન, ન વિરામ દરમિયાન, ન તો શાળા પછીના ક્લબમાં.જોકે, કેટલીક ખાસ જરૂરિયાતો ધરાવતા બાળકોને આ નિયમમાંથી મુક્તિ મળી શકે છે.

શિક્ષણ મંત્રીએ કહ્યુ ફોનથી બાળકોનું માનસિક સ્વાસ્થ્ય બગડે

એક અહેવાલ મુજબ, ડેનમાર્કના બાળકો અને શિક્ષણ મંત્રી માટિયાસ ટેસ્ફેયે જણાવ્યું હતું કે મોબાઇલ ફોન બાળકોને વિચલિત કરે છે અને તેમના માનસિક સ્વાસ્થ્યને નુકસાન પહોંચાડે છે. કમિશનના ચેરમેન રાસમસ મેયર કહે છે, 'બાળકના રૂમમાં ફોન પ્રવેશતાની સાથે જ તે તેના જીવન પર કબજો કરી લે છે.' આનાથી બાળકોનો આત્મવિશ્વાસ અને આત્મસન્માન બંને નબળો પડી શકે છે.

કમિશનના રિપોર્ટમાં ચોંકાવનારા તથ્યો

1. લગભગ ૯૪% બાળકો ૧૩ વર્ષની ઉંમર પહેલા સોશિયલ મીડિયા પ્લેટફોર્મ પર સક્રિય થઈ જાય છે, જ્યારે ત્યાં લઘુત્તમ વય મર્યાદા ૧૩ વર્ષ છે.

2.૯ થી ૧૪ વર્ષના બાળકો સોશિયલ મીડિયા પર દિવસમાં લગભગ ૩ કલાક વિતાવે છે

3. બાળકો હાનિકારક સામગ્રી, હંમેશા ઓનલાઈન રહેવાનું દબાણ અને અન્ય લોકો સાથે સરખામણી જેવી સમસ્યાઓનો સામનો કરી રહ્યા છે.

4. એટલું જ નહીં, વધુ પડતા સ્ક્રીન ટાઈમને કારણે, બાળકો હવે પહેલાની જેમ રમવાનું, પરિવાર સાથે સમય વિતાવવાનું અને પોતાના શોખ પૂરા કરવાનું ભૂલી રહ્યા છે.

સરકારના નિર્ણયને મળી રહ્યું છે સમર્થન

આ નિર્ણયને ડેનમાર્કના સંસ્કૃતિ મંત્રી જેકબ એંગેલ-શ્મિટ દ્વારા પણ સમર્થન આપવામાં આવ્યું છે. તેમણે કહ્યું કે સ્ક્રીન આપણા બાળકોનું બાળપણ છીનવી રહી છે.જો કે, દરેક જણ આ નિર્ણય સાથે સંપૂર્ણપણે સહમત નથી. ડેનમાર્કની કેટલીક શાળાઓના આચાર્યોએ ચિંતા વ્યક્ત કરી છે કે તેમની શાળાઓમાં પહેલાથી જ મોબાઇલ ઉપયોગ અંગે નિયમો છે અને તેમને ડર છે કે સરકારી દખલગીરી તેમની સ્વાયત્તતાને અસર કરશે.

ફ્રાન્સમાં પણ ફોન પર છે પ્રતિબંધ

ડેનમાર્ક હવે એવા દેશોની યાદીમાં જોડાવા જઈ રહ્યું છે જે બાળકોને ડિજિટલ દુનિયાની ખરાબ અસરોથી બચાવવા માટે કડક પગલાં લઈ રહ્યા છે.ફ્રાન્સે 2018 માં શાળાઓમાં મોબાઇલ ફોન પર પ્રતિબંધ મૂક્યો હતો અને નોર્વેએ સોશિયલ મીડિયાના ઉપયોગ માટે લઘુત્તમ વય 15 વર્ષ નક્કી કરી છે. એકંદરે, ડેનમાર્કનું આ પગલું બાળકોના કલ્યાણ માટે એક મજબૂત પ્રયાસ છે. જોકે, તેના અમલીકરણ પછી, બાળકો, માતાપિતા અને શાળાઓ પર તેની શું અસર પડશે તે જોવું રસપ્રદ રહેશે.