રાજકોટ માર્કેટ યાર્ડમાં વેંચાતી તમામ જણસીઓમાં સૌથી મોંઘી જણસી એવા જીરૂની આજે ૫૧,૦૦૦ મણની આવક થઇ હતી અને હરરાજીમાં ગુણવત્તા અનુસાર પ્રતિ ૨૦ કિલોના રૂ.૩૫૭૦થી ૪૦૫૦ના ભાવે સોદા થયા હતા. આજે રાજકોટ માર્કેટ યાર્ડમાં ખેડૂતોના કુલ ૮૦૦ વાહનોને એન્ટ્રી અપાઇ હતી. યાર્ડમાં માર્ચ એન્ડિંગની એક સપ્તાહની રજા પડે તે પૂર્વે ખેડૂતો જણસીઓ વેંચીને રોકડા કરવા ઉતાવળા બન્યા છે.

વિશેષમાં રાજકોટ માર્કેટ યાર્ડના વેપારી વર્તુળોએ જણાવ્યું હતું કે આજે જીરૂની આવક ૫૧૦૦૦ મણ,તુવેરની આવક ૬૫૦૦, રાય અને રાયડાની આવક ૪૫૦૦ મણ, મેથીની ૪૪૦૦૦ મણ, મગફળીની આવક ૪૮૦૦૦ મણ, કપાસની આવક ૧૦૦૦૦ મણ થઇ હતી. રાજકોટ માર્કેટ યાર્ડના ચેરમેન જયેશભાઇ બોઘરા તથા ડિરેક્ટર્સએ ખેડૂતોને કોઇ મુશ્કેલી ન પડે તેની તકેદારી લીધી હતી.