ટ્રમ્પ અમેરિકાના રાષ્ટ્રપતિ બન્યા ત્યારથી ક્રિપ્ટોકરન્સી માર્કેટમાં તેજી આવી છે, જેના કારણે તેનું કુલ માર્કેટ કેપ હવે માઇક્રોસોફ્ટના માર્કેટ કેપ કરતાં વધુ છે. હાલમાં ક્રિપ્ટોકરન્સીનું માર્કેટ કેપ 3.62 ટ્રિલિયન ડોલર સુધી પહોંચી ગયું છે, જ્યારે માઇક્રોસોફ્ટનું માર્કેટ કેપ 3.085 ટ્રિલિયન ડોલર છે. આ ઉછાળાએ ક્રિપ્ટોકરન્સીને વિશ્વની બીજી સૌથી મૂલ્યવાન સંપત્તિ બનાવી દીધી છે, જેમાં એપલ જ તેની આગળ છે, જેનું માર્કેટ કેપ 3.548 ટ્રિલિયન ડોલરથી વધુ છે.
ક્રિપ્ટોકરન્સીના ભાવમાં આ વધારો મુખ્યત્વે રાજકીય અને આર્થિક પરિબળોને કારણે છે. ડોનાલ્ડ ટ્રમ્પ અમેરિકાના રાષ્ટ્રપતિ બન્યા ત્યારથી બજારમાં સકારાત્મક ફેરફારો જોવા મળ્યા છે. નિષ્ણાતો માને છે કે ટ્રમ્પ્ની નીતિઓએ રોકાણકારોનો વિશ્વાસ વધાર્યો છે, જેના કારણે ક્રિપ્ટોકરન્સીમાં મોટા પાયે રોકાણ થયું છે.
જાન્યુઆરી 2015માં ક્રિપ્ટોકરન્સીનું માર્કેટ કેપ ફક્ત 0.004 ટ્રિલિયન ડોલર હતું, જે પછીના વર્ષોમાં ધીમે ધીમે વધતું ગયું. જાન્યુઆરી 2021 માં, તે પહેલી વાર 1 ટ્રિલિયન ડોલરના આંકને સ્પર્શ્યું અને પછી એક વર્ષ પછી તે 2 ટ્રિલિયન ડોલર સુધી પહોંચી ગયું. જોકે, ગયા વર્ષે તે ઘટીને 1 ટ્રિલિયન ડોલર થયું હતું, પરંતુ જાન્યુઆરી 2024 માં તે ફરીથી વધીને 1.75 ટ્રિલિયન ડોલર થયું અને હવે તે 3.62 ટ્રિલિયન ડોલર સુધી પહોંચી ગયું છે.
નિષ્ણાતો માને છે કે જો ક્રિપ્ટોકરન્સીની માંગ આવી જ રહેશે તો આગામી સમયમાં તેનું માર્કેટ કેપ વધુ વધી શકે છે. એચ.સી. વેઇનરાઇટ જેવી મોટી રોકાણ બેંકોએ આગાહી કરી છે કે 2025 ના અંત સુધીમાં બિટકોઇનની કિંમત 225,000 ડોલર સુધી પહોંચી શકે છે. આનાથી માત્ર બિટકોઈન જ નહીં પરંતુ અન્ય ક્રિપ્ટોકરન્સીના ભાવમાં પણ વધારો થવાની શક્યતા છે.
ક્રિપ્ટો માર્કેટના વિકાસને જાળવી રાખવા માટે અનુકૂળ નિયમનકારી વાતાવરણ પણ જરૂરી રહેશે. ઘણા દેશોએ ક્રિપ્ટોકરન્સીને કાયદેસર બનાવવા માટે પગલાં લીધાં છે, જેનાથી રોકાણકારોનો વિશ્વાસ વધ્યો છે. અમેરિકા સહિત ઘણા દેશોમાં સંભવિત નિયમનકારી ફેરફારો અંગે સકારાત્મક અપેક્ષાઓ છે.