જામનગરના ગુલાબનગર વિસ્તારમાં હાલ રહેતા અને મૂળ ભાણવડ તાલુકાના મોરઝર ગામના રહીશ નિલેશભાઈ જેઠાભાઈ પરમાર નામના ૨૩ વર્ષના યુવાનના ભાઈ વિમલ દ્વારા આજથી આશરે ત્રણેક માસ પૂર્વે એક શખ્સ સામે ફરિયાદ કરવામાં આવી હોવાથી આ અંગેના મનદુ:ખના સમાધાનની વાતચીત કરવા જતા મોરઝર ગામના ભરત બાવનજી બાટા, સુભાષ વીરા રાઠોડ, ખુશાલ ઉર્ફે ગુગો રમેશ ચાનાપા અને વેરાડ ગામના અર્પિત દિનેશભાઈ પરમાર નામના ચાર શખ્સો દ્વારા લાકડા વડે હુમલો કરી, બિભત્સ ગાળો કાઢી, જાનથી મારી નાખવાની ધમકી આપ્યાની ફરિયાદ નિલેશભાઈ પરમાર દ્વારા ભાણવડ પોલીસ મથકમાં નોંધાવવામાં આવી છે.
જે અંગે પોલીસે ચારેય શખ્સો સામે આઈપીસી કલમ ૩૨૩, ૫૦૪, ૫૦૬ (૨), ૧૧૪ તથા જી.પી. એક્ટની કલમ હેઠળ ગુનો નોંધી, આગળની કાર્યવાહી હાથ ધરી છે.
***
જમીન દબાણ અંગેની અરજી કરતાં બાટીસાના યુવાન ઉપર હુમલો

દ્વારકા તાલુકાના બાટીસા ગામે રહેતા પ્રતાપસિંહ નંઢુભા જામ નામના ૩૦ વર્ષના હિન્દુ વાઘેર યુવાનના ખેતરની બાજુમાં આવેલી ગૌચરની તેમજ અન્ય કેટલીક જમીન ઉપર વાવેતર કરી અને બાંધકામ કરવામાં આવ્યું હોવાથી તેમની અવર-જવરનો રસ્તો બંધ થયો હોવા અંગેની ફરિયાદ અરજી તેમણે આ જ ગામના રાયશી ઉર્ફ મીયાઝરભા જોધાભા જામ અને ખેરાજભા ભીખાભાઈ જામ સામે કરતા આનાથી ઉશ્કેરાઈ ગયેલા ઉપરોક્ત બંને શખ્સો તથા અન્ય એક મોબાઈલ નંબર ધરાવતા મેવાસા ગામના ગોપાલ ભરવાડ નામના શખ્સો દ્વારા તેમને બિભત્સ ગાળો કાઢી, માર મારી, અને ૨૪ કલાકમાં જાનથી મારી નાખવાની ધમકી આપ્યાની ફરિયાદ દ્વારકા પોલીસ મથકમાં નોંધાવવામાં આવી છે. જે અંગે પોલીસે ત્રણેય શખ્સો સામે આઈ.પી.સી. કલમ ૩૨૩, ૫૦૪ તથા ૫૦૬ (૨) મુજબ ગુનો નોંધ્યો છે.