ગુજરાતમાં કોરોના વાયરસના કેસોમાં ચિંતાજનક ઉછાળો યથાવત છે. આજે રાજ્યમાં કોરોનાના નવા 167 કેસ નોંધાયા છે, જે અત્યાર સુધીના દૈનિક કેસોમાં એક મોટો ઉછાળો સૂચવે છે. આ સાથે જ કુલ એક્ટિવ કેસની સંખ્યા વધીને 615 પર પહોંચી ગઈ છે, જે આરોગ્ય તંત્ર માટે ગંભીર પડકાર ઊભો કરી રહી છે.

કેસોમાં વધારાને ધ્યાનમાં રાખીને, કેન્દ્ર કોરોના માટેની તૈયારીઓ ચકાસવા માટે મોક ડ્રીલ કરી રહ્યું છે. કોવિડના વધતા કેસોને ધ્યાનમાં રાખીને તમામ રાજ્યોને ઓક્સિજન, આઇસોલેશન બેડ, વેન્ટિલેટર અને આવશ્યક દવાઓની ઉપલબ્ધતા સુનિશ્ચિત કરવા સૂચના આપવામાં આવી છે. ભારતમાં 5,364 સક્રિય કેસ છે. છેલ્લા 24 કલાકમાં ચાર નવા મૃત્યુ નોંધાયા છે.

સત્તાવાર સૂત્રો અનુસાર, મોટાભાગના કેસ હળવા અથવા એસિમ્પટમેટિક છે. તેમની સારવાર ઘરે જ કરી શકાય છે, ફક્ત પોતાને અલગ રાખવાની જરૂર છે જેથી તે અન્ય લોકોમાં ફેલાય નહીં. આ વર્ષે જાન્યુઆરીથી અત્યાર સુધીમાં કોરોનાને કારણે દેશમાં કુલ 55 મૃત્યુ થયા છે. 22 મેના રોજ, દેશમાં કુલ 257 સક્રિય દર્દીઓ હતા.

અગાઉ 2 અને 3 જૂનના રોજ, આરોગ્ય સેવા મહાનિર્દેશક ડૉ. સુનિતા શર્માની અધ્યક્ષતામાં ડિઝાસ્ટર મેનેજમેન્ટ સેલ, ઇમરજન્સી મેનેજમેન્ટ રિસ્પોન્સ સેલ, નેશનલ સેન્ટર ફોર ડિસીઝ કંટ્રોલ,ઇન્ડિયન કાઉન્સિલ ઓફ મેડિકલ રિસર્ચ ઇન્ટિગ્રેટેડ ડિસીઝ સર્વેલન્સ પ્રોગ્રામ દિલ્હીમાં કેન્દ્ર સરકારની હોસ્પિટલો અને તમામ રાજ્યો અને કેન્દ્રશાસિત પ્રદેશોના પ્રતિનિધિઓ સાથે વર્તમાન કોરોના પરિસ્થિતિ અને તૈયારીઓનું મૂલ્યાંકન કરવા માટે શ્રેણીબદ્ધ તકનીકી સમીક્ષા બેઠકો યોજાઈ હતી.