પેટના દુ:ખાવાથી કંટાળી જઇને પગલુ ભરી લેતા શોકની લાગણી

લાલપુર તાલુકાના ઈશ્વરીયા ગામમાં રહેતી એક કોલેજીયન યુવતીએ પેટના દુખાવાની બીમારીથી કંટાળી ઝેરી દવા પી લઇ આત્મહત્યા કરી લીધી છે. જેથી ભારે અરેરાટી ફેલાઇ ગઇ છે.

લાલપુર તાલુકાના ઈશ્વરીયા ગામમાં રહેતી અને અભ્યાસ કરતી ભાર્ગવીબેન મહેશભાઈ સાવલિયા નામની 20 વર્ષની કોલેજીયન યુવતીએ ગત તા. 8ના પોતાના ઘેર જંતુનાશક દવા પી લઈ આત્મહત્યાનો પ્રયાસ કરતાં તેણીને સારવાર માટે જામનગરની હોસ્પિટલમાં દાખલ કરવામાં આવી હતી. જ્યાં સારવાર દરમિયાન તેણીનું મૃત્યુ  નિપજ્યું છે.

આ બનાવ અંગે મૃતકના પિતા મહેશભાઈ દામજીભાઈ સાવલિયાએ પોલીસને જાણ કરતાં લાલપુરના એ.એસ.આઇ. ડી.ડી. જાડેજા જી.જી. હોસ્પિટલમાં દોડી આવ્યા હતા, અને કોલેજીયન યુવતીના મૃતદેહનો કબજો સંભાળી પોસ્ટ મોર્ટમ કરાવ્યું હતું, અને વધુ તપાસ હાથ ધરી છે.

પોલીસ તપાસ દરમિયાન તેણીને છેલ્લા બે માસથી સતત પેટમાં દુખાવો રહેતો હતો, અને તેની દવા પણ ચાલતી હતી. પરંતુ સા નહી થતા આ બીમારીથી કંટાળી જઈ આ પગલું ભરી લીધાનું પોલીસમાં જાહેર થયું છે.