અમદાવાદ ઑનલાઇન ફાર્મસી પ્લેટફોર્મ્સ દ્વારા પ્રિસ્ક્રિપ્શન ચકાસણીમાં ગંભીર ખામીઓ હોવાનો આરોપ લગાવતા ગુજરાતના કેમિસ્ટ સંગઠનોએ ચોંકાવનારો ખુલાસો કર્યો છે. ફેડરેશન ઓફ ગુજરાત સ્ટેટ કેમિસ્ટ્સ એન્ડ ડ્રગિસ્ટ્સ એસોસિયેશનના પ્રમુખ જશવંત પટેલે જણાવ્યું કે તેમણે એક પ્રકારનું ‘સ્ટિંગ ઓપરેશન’ હાથ ધર્યું હતું, જેમાં એઆઈ દ્વારા બનાવેલા નકલી પ્રિસ્ક્રિપ્શનનો ઉપયોગ કરીને ઓનલાઈન દવાઓ મંગાવવામાં આવી હતી. આ પ્રિસ્ક્રિપ્શનમાં ભૂતપૂર્વ વડાપ્રધાન મનમોહન સિંહ, ભૂતપૂર્વ રાષ્ટ્રપતિ રામનાથ કોવિંદ, કેન્દ્રીય મંત્રી પીયુષ ગોયલ અને ગુજરાતના આરોગ્ય મંત્રી પ્રફુલ પાનસુરીયા જેવા નામોનો ઉપયોગ કરવામાં આવ્યો હતો. પટેલના જણાવ્યા પ્રમાણે, ઉદ્દેશ માત્ર એટલો હતો કે ઇ-ફાર્મસી પ્લેટફોર્મ્સ દવાઓ મોકલતા પહેલા ખરેખર પ્રિસ્ક્રિપ્શન ચકાસે છે કે નહીં તે તપાસવું. તેમણે દાવો કર્યો કે એઆઈ દ્વારા બનાવેલા અને જૂના પ્રિસ્ક્રિપ્શન પર આધારિત ઓર્ડર પણ સ્વીકારવામાં આવ્યા અને દવાઓ સરળતાથી ડિલિવર થઈ ગઈ. આ ઘટનાએ ઓનલાઈન દવા વેચાણની પ્રક્રિયા અને તેની સલામતી અંગે ગંભીર પ્રશ્નો ઉભા કર્યા છે. એફજીએસસીડીએ અનુસાર, ઘણા ઓનલાઈન પ્લેટફોર્મ્સ એન્ટી-એન્ઝાયટી, એન્ટીડિપ્રેસન્ટ અને સાયકોટ્રોપિક દવાઓ જેવી નિયંત્રિત દવાઓ પણ સરળતાથી પહોંચાડી રહ્યા છે, જ્યારે આવી દવાઓ માટે સાયકિયાટ્રિસ્ટનું માન્ય પ્રિસ્ક્રિપ્શન જરૂરી હોય છે. સંગઠનનું કહેવું છે કે આ માત્ર ગેરકાયદેસર જ નહીં પરંતુ લોકોના આરોગ્ય માટે પણ જોખમી છે. આ મુદ્દાને લઈને સમગ્ર દેશમાં કેમિસ્ટો દ્વારા બુધવારે બંધનું આયોજન કરવામાં આવ્યું છે. ઓલ ઈન્ડિયા ઓર્ગેનાઈઝેશન ઓફ કેમિસ્ટ્સ એન્ડ ડ્રગિસ્ટ્સ (એઆઈઓસીડી), જે દેશભરના લગભગ 12.4 લાખ કેમિસ્ટ, ફાર્માસિસ્ટ અને ડિસ્ટ્રિબ્યુટર્સનું પ્રતિનિધિત્વ કરે છે, તેણે પણ આ વિરોધને સમર્થન આપ્યું છે. ગુજરાતમાં અંદાજે 33,000 કેમિસ્ટો આ બંધમાં જોડાશે. કેમિસ્ટ સંગઠનોનું કહેવું છે કે પરંપરાગત દવા દુકાનોને કડક લાઇસન્સ અને નિરીક્ષણ નિયમોનું પાલન કરવું પડે છે, જ્યારે ઇ-ફાર્મસી પ્લેટફોર્મ્સ નિયમનના “ગ્રે ઝોન”માં કાર્ય કરી રહ્યા છે. તેઓએ સરકારની જીએસઆર 220(ઈ) અને જીએસઆર 817(ઈ) જેવી સૂચનાઓનો પણ વિરોધ કર્યો છે. બીજી તરફ, સંગઠનોએ સ્પષ્ટ કર્યું છે કે બંધ દરમિયાન ઇમરજન્સી દવાઓની સેવા ચાલુ રહેશે જેથી દર્દીઓને મુશ્કેલી ન પડે.