જામનગરમાં સમર્પણ સર્કલ નજીક એક નવા બાંધકામના સ્થળે સેન્ટીંગ કામ કરી રહેલા શ્રમિક યુવાનને લોખંડનો સળીયો ઉપર કરવા જતાં વીજ લાઈનમાંથી એકાએક વીજ આંચકો લાગવાથી મૃત્યુ થયું છે.
જામનગરમાં બેડી થરી વિસ્તારમાં રહેતો અને સેન્ટીંગ કામની મજૂરી કરતો ગફાર સિદીકભાઇ મકવાણા નામનો ૩૪ વર્ષનો શ્રમિક યુવાન સમર્પણ સર્કલ નજીક નવા બાંધકામના સ્થળે સેન્ટીંગનું કામ કરી રહ્યો હતો. જે દરમિયાન સેન્ટીંગ નો લોખંડનો સળીયો પોતાના હાથમાં રાખીને ઉપર કરવા જતી વેળાએ ઉપરથી પસાર થઈ રહેલા વિજતારને અડી જતાં તેને એકાએક વિજ આંચકો લાગ્યો હતો, અને બેશુદ્ધ બન્યો હતો.
જેને સારવાર માટે જામનગરની જી.જી. હોસ્પિટલમાં લઈ જવાયા પછી ફરજ પરના તબીબે મૃત્યુ નીપજ્યું હોવાનું જાહેર કર્યું હતું. આ બનાવ અંગે સેન્ટિંગ કામના સાથી કર્મચારી કરીમભાઇ મિયાણાએ પોલીસને જાણ કરતાં સિટી સી. ડિવિઝન પોલીસે આગળની કાર્યવાહી હાથ ધરી છે.