આજે સાંજે 5 વાગ્યાથી ભારત-પાકિસ્તાન વચ્ચે યુદ્ધવિરામ લાગુ થયું છે. ક્ષેત્રની શાંતિ અને સુરક્ષા માટે લેવાયો નિર્ણય લેવાયો હોવાની વિદેશ સચિવ વિક્રમ મિસરી પ્રેસ કોન્ફરન્સ યોજી જાહેરાત કરી છે.  આ અંગે પાકિસ્તાનના વિદેશ મંત્રીએ પણ સીઝફાયરની પુષ્ટિ આપી છે. 

પાકિસ્તાનના DGMOએ ભારતનો કર્યો હતો સંપર્ક, બપોરે 3: 35 યુદ્ધ વિરામ માટે થઈ હતી વાતચીત

ભારત પાકિસ્તાન યુદ્ધવિરામ: ઓપરેશન સિંદૂર હેઠળ ભારતીય સેના દ્વારા કરવામાં આવેલી કાર્યવાહીથી ગભરાયેલા પાકિસ્તાને વિશ્વના દેશોને ભારત સાથે શાંતિ અને સમાધાન માટે અપીલ કરી હતી. આ દરમિયાન, યુએસ રાષ્ટ્રપતિ ડોનાલ્ડ ટ્રમ્પે ટ્રુથ સોશિયલ પર એક પોસ્ટ દ્વારા ભારત અને પાકિસ્તાન વચ્ચે યુદ્ધવિરામનો દાવો કર્યો.

ટ્રમ્પના આ નિવેદનની ભારત સરકારના ટોચના સૂત્રો દ્વારા પુષ્ટિ કરવામાં આવી છે. જોકે, ભારત સરકારે સ્પષ્ટતા કરી હતી કે ભારત અને પાકિસ્તાન વચ્ચે ગોળીબાર અને લશ્કરી કાર્યવાહી બંધ કરવાનો નિર્ણય બંને દેશો વચ્ચે સીધો લેવામાં આવ્યો હતો. આ અંગે માહિતી આપતાં વિદેશ મંત્રાલયના સચિવ વિક્રમ મિશ્રીએ જણાવ્યું હતું કે શનિવાર (૧૦ મે, ૨૦૨૫) બપોરે પાકિસ્તાનના ડીજીએમઓએ ફોન કરીને પહેલ કરી હતી, ત્યારબાદ ચર્ચા થઈ હતી અને સર્વસંમતિ સધાઈ હતી. તેમણે કહ્યું કે અન્ય કોઈ સ્થળે અન્ય કોઈ મુદ્દા પર વાતચીત કરવાનો કોઈ નિર્ણય લેવામાં આવ્યો નથી.

આ પહેલા અમેરિકાના રાષ્ટ્રપતિ ટ્રમ્પે દાવો કર્યો હતો કે અમેરિકાની મધ્યસ્થીથી બંને દેશો વચ્ચે યુદ્ધવિરામ કરાર થયો છે. તેમણે કહ્યું, "યુનાઇટેડ સ્ટેટ્સ દ્વારા મધ્યસ્થી કરાયેલી લાંબી રાતની વાટાઘાટો પછી, મને જાહેરાત કરતા આનંદ થાય છે કે ભારત અને પાકિસ્તાન સંપૂર્ણ અને તાત્કાલિક યુદ્ધવિરામ માટે સંમત થયા છે. બંને દેશોને અભિનંદન. આ બાબત પર ધ્યાન આપવા બદલ આભાર."

પાકિસ્તાનના વિદેશ મંત્રી ઇશાક ડારે X પર પોસ્ટ કરી છે કે પાકિસ્તાન અને ભારત તાત્કાલિક અસરથી યુદ્ધવિરામ પર સંમત થયા છે. જોકે, તેમણે ભારત પર હુમલો કરવાના નિષ્ફળ પ્રયાસો માટે માફી માંગી ન હતી. તેમણે વધુમાં દાવો કર્યો કે પાકિસ્તાન હંમેશા તેની સાર્વભૌમત્વ અને પ્રાદેશિક અખંડિતતા સાથે સમાધાન કર્યા વિના ક્ષેત્રમાં શાંતિ અને સુરક્ષા માટે પ્રયત્નશીલ રહ્યું છે.