દેશમાં છેલ્લા ૫ વર્ષમાં રેસિડેન્શિયલ પ્રોપર્ટીની કિંમતોમાં તેજી આવી છે. સપનાનું ઘર ખરીદવું મોંઘું થઈ ગયું છે. બેંગલુરુ, મુંબઈ સહિત દેશના મોટા શહેરોમાં ઘરોની કિંમતો ૪૮ ટકા સુધી વધી છે.

છેલ્લા પાંચ વર્ષમાં ભારતના મોટા શહેરોમાં રેસિડેન્શિયલ પ્રોપર્ટીની કિંમતોમાં સરેરાશ ૪૮% ની તેજી આવી છે. ધ ૧ ફાઇનાન્સ હાઉસિંગ ટોટલ રિટર્ન ઇન્ડેક્સ (TRI) ૨૦૨૦ માં ૧૬૭ થી વધીને ૨૦૨૫ માં ૨૪૭ સુધી પહોંચી ગયો, જે હાઉસિંગ માર્કેટમાં મજબૂત વૃદ્ધિ દર્શાવે છે. દેશના મુખ્ય શહેરો જેમ કે બેંગલુરુ અને મુંબઈમાં પ્રોપર્ટીની કિંમતોમાં તેજી આવી છે. બેંગલુરુ ૭૯% ની શાનદાર તેજી સાથે સૌથી આગળ છે. અહીંયા સૌથી વધુ પ્રોપર્ટીના ભાવ વધ્યા છે.

આંકડા મુજબ મુંબઈમાં ₹૨૬,૯૭૫ પ્રતિ વર્ગ ફૂટ સાથે ભારતનું સૌથી મોંઘું રેસિડેન્શિયલ માર્કેટ છે. પુણેમાં ડેવલપર્સે માર્કેટને ધ્યાનમાં રાખીને નવા પ્રોજેક્ટ્સ ૨૦% ઓછા કર્યા છે. હૈદરાબાદમાં વેચાઈ ન હોય તેવી પ્રોપર્ટી ૧૭૭% વધી, જે વધુ સપ્લાય તરફ ઈશારો કરે છે. દિલ્હી NCR માં માંગ મજબૂત રહી, જ્યાં વેચાઈ ન હોય તેવી પ્રોપર્ટી ૩૦% ઘટી. ચેન્નઈમાં સપ્લાય-ડિમાન્ડમાં ગડબડ છે. નવા પ્રોજેક્ટ્સ ૫૧% વધ્યા, પરંતુ વેચાણ માત્ર ૧૦% વધ્યું. કોલકાતાનું માર્કેટ નાનું થયું, જ્યાં નવા લોન્ચ અને વેચાણ ૨૯% ઓછા થયા.

આ ઇન્ડેક્સ RERA-રજિસ્ટર્ડ પ્રોપર્ટીના જૂના ટ્રાન્ઝેક્શન ડેટા, વેચાણ મૂલ્ય અને વિસ્તારના આધારે બનાવવામાં આવ્યો છે. મુંબઈ અને પુણેમાં કિંમતો કાર્પેટ એરિયા પર, જ્યારે બાકીના શહેરોમાં સુપર બિલ્ટ-અપ એરિયા પર છે.

પ્રોપર્ટીની કિંમત અને ભવિષ્યની વૃદ્ધિ
૨૦૨૦ થી ૨૦૨૫ સુધીમાં નવા ઘરોના લોન્ચ ૧૦% વધ્યા છે, પરંતુ વેચાણ ૩૩% વધ્યું છે, એટલે કે માંગ સપ્લાય કરતાં વધુ છે. વેચાઈ ન હોય તેવી પ્રોપર્ટી ૩૨% વધી, છતાં કિંમતો ૪૮% ઉપર ગઈ, જે દર્શાવે છે કે રિયલ એસ્ટેટ માર્કેટમાં હજુ પણ વૃદ્ધિની સંભાવના છે.

શું હજુ વૃદ્ધિ થશે?
કોવિડ પછીની તેજ ઉછાળ હવે કદાચ ધીમી પડે, પરંતુ માર્કેટ હવે સ્થિર વૃદ્ધિ તરફ જઈ રહ્યું છે. મજબૂત માંગ અને ઇન્ફ્રાસ્ટ્રક્ચરમાં સુધારા, ખાસ કરીને પબ્લિક ટ્રાન્સપોર્ટ અને સોશિયલ ઇન્ફ્રાસ્ટ્રક્ચરમાં સરકારી રોકાણ, કિંમતોને ધીમે ધીમે વધારશે. આનાથી માત્ર મોટા શહેરોમાં જ નહીં પરંતુ તેમની આસપાસના વિસ્તારોમાં પણ નવી વૃદ્ધિની સંભાવનાઓ ખુલશે.