રાજકોટ મ્યુનિસિપલ કમિશનર તુષાર સુમેરાના આદેશથી આજે સેન્ટ્રલ ઝોન હેઠળના વોર્ડ નંબર ૩ માં આવેલા માધાપર વિસ્તારમાં મેગા ડિમોલિશન હાથ ધરવામાં આવ્યું હતું અને ૨૦ જેટલા ગેરકાયદેસર બાંધકામો ઉપર બુલડોઝર ફેરવી દેવાયું હતું.
વિશેષમાં અંગે મ્યુનિ.અધિકારી સૂત્રોએ જણાવ્યું હતું કે એડિશનલ સીટી એન્જિનિયર એ.એ.રાવલ સહિતની ટીમ વિજિલન્સ પોલીસના ચુસ્ત બંદોબસ્ત સાથે ત્રાટકી હતી અને માધાપર ટીપી સ્કીમ નંબર ૩૮૧ ઉપરના કુલ બે ૧૮ મીટરના ટીપી રોડ ઉપરથી દબાણો દૂર કરવામાં આવ્યા હતા જેમાં સૌ પ્રથમ માધાપર તાલુકા સ્કૂલ વાળા ૧૮ મીટર ના રોડ ઉપર આવેલા છ જેટલા ગેરકાયદેસર રહેણાંક મકાનો બે કોમર્શિયલ હેતુના ગેરકાયદેસર બાંધકામો અને એક કમ્પાઉન્ડ વોલ સહિતના ૯ બાંધકામો પર બુલડોઝર ફેરવી દેવાયું હતું. ત્યારબાદ ધ સ્પેસ એપાર્ટમેન્ટની પાછળ આવેલા ૧૮ મીટરના ટીપી રોડ ઉપર થી છ રહેણાંક મકાનો ચાર ઔધોગિક સેડ અને કમ્પાઉન્ડ વોલ સહિતના કુલ ૧૧ જેટલા ગેરકાયદેસર બાંધકામો તોડી પાડવામાં આવ્યા હતા. આ મુજબ માધાપર વિસ્તારમાં આજે કુલ ૨૦ જેટલા ગેરકાયદે બાંધકામોનો સફાયો કરવામાં આવ્યો હતો.