ચૂંટણી પહેલા સામાન્ય જનતા માટે એક ખુબ જ સારા સમાચાર આવ્યા છે. મોંઘવારી છેલ્લા 10 મહિનાના સૌથી નીચા સ્તરે આવી ગઈ છે. સરકારી આંકડા અનુસાર માર્ચ 2024માં છૂટક ફુગાવો ઘટીને 4.85% પર આવી ગયો છે. ચાલો એક નજર કરીએ સંપૂર્ણ અહેવાલ.

ચૂંટણી પહેલા સામાન્ય જનતા માટે એક ખુબ જ સારા સમાચાર આવ્યા છે. મોંઘવારી 10 મહિનાના સૌથી નીચા સ્તરે આવી ગઈ છે. સરકારી આંકડા અનુસાર માર્ચ 2024માં છૂટક ફુગાવો ઘટીને 4.85% પર આવી ગયો છે. અગાઉ ફેબ્રુઆરી 2024માં ફુગાવો 5.09% હતો. માર્ચ મહિનામાં ખાદ્ય પદાર્થોના ભાવમાં ઘટાડો થયો છે. મોંઘવારી સંબંધિત આરબીઆઈની રેન્જ 2%-6% છે. ફુગાવાનો દર હજુ પણ આરબીઆઈના આદર્શ સ્તર 4% કરતા વધુ છે, જેને નિયંત્રિત કરવા માટે કેન્દ્રીય બેંક તેના શ્રેષ્ઠ પ્રયાસો કરશે.

ઉત્પાદનમાં પણ આવ્યો ઉછાળો
ફેબ્રુઆરીમાં ભારતનું ઔદ્યોગિક ઉત્પાદન 5.7 ટકાના ચાર મહિનાની ટોચે પહોંચ્યું હતું. ગયા મહિને તે 4.2 ટકા હતું. માર્ચમાં વાર્ષિક ધોરણે ઈંધણના ભાવમાં 3.2%નો ઘટાડો જોવા મળ્યો છે, જ્યારે ફેબ્રુઆરીમાં 0.77%નો ઘટાડો થયો હતો. ગ્રામીણ ફુગાવાનો દર 5.34% થી વધીને 5.45% થયો છે, જ્યારે શહેરી ફુગાવાનો દર 4.78% થી ઘટીને 4.14% થયો છે.