આજે રમાનારી ટી-20 વર્લ્ડ કપની ફાઈનલ મેચને લઈને માત્ર ક્રિકેટ પ્રેમીઓમાં જ નહીં, પરંતુ સટ્ટાબજારમાં પણ ભારે ઉત્તેજના જોવા મળી રહી છે. ભારત અને ન્યૂઝીલેન્ડ વચ્ચેના આ મહામુકાબલામાં સટ્ટાબજારના ગણિત મુજબ ભારત 'હોટ ફેવરિટ' મનાઈ રહ્યું છે. મેદાન પર ભલે ખેલાડીઓ વચ્ચે જંગ જામશે, પરંતુ પડદા પાછળ હજારો કરોડ રૂપિયાની હાર-જીતનો ખેલ શરૂ થઈ ચૂક્યો છે.

સટ્ટાબજારમાં ભાવની સ્થિતિ

મેચની પૂર્વ સંધ્યાએ જ બુકીઓ દ્વારા ભાવ ખોલવામાં આવ્યા છે, જે ભારતીય ટીમની મજબૂતી દર્શાવે છે​​​​​​​

ભારતનો ભાવ: 45 પૈસા (ભારત જીતશે તેવી શક્યતા વધુ હોવાથી નીચો ભાવ).

ન્યૂઝીલેન્ડનો ભાવ: રૂ.1.90

આ ભાવ સૂચવે છે કે સટ્ટાખોરો ભારતની જીત પર પૂરો ભરોસો મૂકી રહ્યા છે. બુકીઓના અંદાજ મુજબ, માત્ર આજની ફાઈનલ મેચ પર જ 10,000 કરોડ રૂપિયાથી વધુનો સટ્ટો રમાય તેવી શક્યતા છે.

ટોસ અને સેશન પર કરોડોનો ખેલ

માત્ર મેચની હાર-જીત જ નહીં, પણ મેચની દરેક હિલચાલ પર સટ્ટો રમાઈ રહ્યો છે.

ટોસ પર સટ્ટો: મેચની શરૂઆત પહેલા ટોસ કોણ જીતશે, તેના પર જ અંદાજે 200 કરોડ રૂપિયાનો સટ્ટો લાગવાની ધારણા છે.

સેશન અને સ્કોર: પ્રથમ 6 ઓવર (પાવરપ્લે), 10 ઓવર અને અંતિમ સ્કોર કેટલો થશે તેવા 'સેશન' અને 'ફેન્સી' સોદાઓ પર બુકીઓ 5,000 કરોડથી વધુ રકમનો દાવ ખેલશે તેવું મનાય છે.

પોલીસથી બચવા 'હાઈટેક' નુસખા

સટ્ટાબજાર પર પોલીસની કડક નજર હોવાથી સટ્ટોડિયાઓએ પોતાની પદ્ધતિ બદલી છે. પોલીસના દરોડાથી બચવા માટે હવે ફિક્સ લોકેશનને બદલે ચાલુ કારમાં લેપટોપ અને મોબાઈલ દ્વારા મેચના સોદા કરવામાં આવી રહ્યા છે. હાઈવે પર દોડતી ગાડીઓ જાણે હરતા-ફરતા સટ્ટાના ડબ્બા બની ગયા છે. આ સિવાય અત્યાધુનિક એપ્સ અને બેનામી લાઈનનો ઉપયોગ કરીને આંતરરાજ્ય નેટવર્ક ચલાવવામાં આવી રહ્યું છે.

ક્રિકેટ ફીવર કે આર્થિક જોખમ?

એક તરફ ચાહકો ભારતની જીત માટે પ્રાર્થના કરી રહ્યા છે, તો બીજી તરફ સટ્ટાબજારમાં હાર-જીતના સમીકરણો મંડાઈ રહ્યા છે. સાયબર ક્રાઈમ અને સ્થાનિક પોલીસ સક્રિય હોવા છતાં, ટેકનોલોજીના માધ્યમથી આ ગેરકાયદે પ્રવૃત્તિ પૂરજોશમાં ચાલી રહી છે. બુકીઓના મતે, જો ભારત ટોસ જીતીને પ્રથમ બેટિંગ કરે છે, તો સટ્ટાના ભાવમાં હજુ પણ મોટા ફેરફાર જોવા મળી શકે છે.