લોકસભાની રાજકોટ બેઠકના ભાજપના ઉમેદવાર પુરૂષોત્તમ પાલાના સમર્થનમાં રાજકોટ જિલ્લા પંચાયતની ભાડલા સીટના આગેવાનો અને કાર્યકરો સાથે બેઠકનું આયોજન કરવામાં આવ્યું હતું અને તેમાં પાખી હાજરીનો મુદ્દો અત્યારે ચર્ચાનો વિષય બનેલ છે.ઓછી હાજરીના મામલે કેબિનેટ મંત્રી કુંવરજીભાઈ બાવળિયાએ એવી કોમેન્ટ કરી છે કે આટલી ઓછી હાજરી કેમ હોઈ શકે? અમે તો વિછીયા અને જસદણ તાલુકામાં વિકાસના જે ભરપૂર કામ કર્યા છે તે જોતા અહીં કીડીયા ઉભરાવું જોઈએ.

સામાન્ય રીતે બાવળિયાની આ પ્રકારની કોમેન્ટ મોટાભાગે ડોકટર ભરતભાઈ બોઘરા તરફ અંગુલી નિર્દેશ કરતી હોય છે. પરંતુ આમાં તેવું પણ જણાતું નથી. કારણકે ભાડલા બેઠક પર જિલ્લા પંચાયતમાં જે સભ્ય ચૂંટાયા છે તે રાજકીય રીતે ડોકટર ભરતભાઈ બોઘરાના જૂથમાં ગણવામાં આવતા નથી.
આ બાબતે વધુ માહિતી મેળવવા માટે કેબિનેટ મંત્રી કુંવરજીભાઈ બાવળિયાનો ટેલીફોનિક સંપર્ક સાધવાનો પ્રયાસ કરાયો હતો. પરંતુ તેમનો ફોન નો– રીપ્લાય રહ્યો હતો.

કુંવરજીભાઈ બાવળિયાની ગણતરી સિનિયર અને સિઝન્ડ રાજકારણીમાં થાય છે. ગણતરી વગર અથવા તો અજાણતા તેનાથી કાંઈ આડાઅવળું બોલાઈ જાય તેવું ભાગ્યે જ બનતું હોય છે.પાંખી હાજરીના મામલે તેમણે કરેલું નિવેદન સ્વાભાવિક પ્રક્રિયાના ભાગરૂપે થયું હશે કે ગણતરીપૂર્વકનું? જો ગણતરીપૂર્વકનું હોય તો આમાં તેની શું ગણતરી હશે? તેવા સવાલો રાજકારણમાં અને તેમાં પણ ખાસ કરીને ભાજપના આંતરિક રાજકારણમાં પૂછાઈ રહ્યા છે.