આ કેસની હકિકત મુજબ ગઈ તારીખ 1/ 11/ 2024ના રોજ રાજકોટમાં જામનગર રોડ મનહરપુર ૧માં આવેલી પૃથ્વીરાજ સોસાયટીમાં રહેતા ફરીયાદી પ્રકાશભાઈ ઉર્ફે પીન્ટુભાઈ રમેશભાઈ લખલાણી અયોધ્યા ચોક પાસે, ટાઈમ સ્કવેર બીલ્ડીંગ સામે ફુટપાથ ઉપર ઉભા રહી પોતાના મિત્ર રફીકભાઈ સાથે વાતચીત કરતા હતા ત્યારે જુની અદાવતનો ખાર રાખી મીત ધામેચા, મનીષ ધામેચા, અમીત ધામેચા, ચિરાગભાઈ ધામેચા અને અશોકસિંહ ઉર્ફે આર.સી. ગોહીલ નામના શખ્સોએ છરી અને પાઇપ વડે હુમલો કરી માર માર્યો હતો. આ અંગે ગાંધીગ્રામ પોલોસમાં ફરિયાદ નોંધાતા આરોપીઓની ધરપકડ કરી જેલ હવાલે કર્યા હતા. આ કેસનું ચાર્જશીટ મુકાઈ જતા જેલ હવાલે રહેલા પૈકીના આરોપી અમીત બાબુભાઈ ધામેચા અને અશોકસિંહ ઉર્ફે રૂતુરાજસિંહ ઉર્ફે આર.સી. જગદીશભાઈ ગોહેલે સેશન્સ કોર્ટમાં જામીન અરજી દાખલ કરી હતી. જે જામીન અરજી ચાલવા ઉપર આવતા બચાવ પક્ષે રોકાયેલ એડવોકેટ દ્વારા દલીલ કરવામાં આવી હતી કે ઇજાગ્રસ્તનું ડીડી અને ચાર્જશીટમાં જોવામાં આવે તો હાલના આરોપીઓએ ઇજા કરેલ છે તેવું દર્શાવેલ નથી, આરોપીઓને અગાઉના કેસમાં ક્યાંય સજા થઈ નથી, તેમજ ટાંકેલા ઉચ્ચ અદાલતના ચુકાદાઓ ધ્યાને લઇ સેશન્સ કોર્ટે બંને આરોપીને જામીન મુક્ત કરવા હુકમ કર્યો છે. આ કેસમાં આરોપીઓ વતી એડવોકેટ રોહીતભાઈ બી. ઘીયા, હર્ષ રોહીતભાઈ ઘીયા અને મદદમાં રીધ્ધીબેન ખંધેડીયા રોકાયા હતા.