તમિલનાડુના તિરુવલ્લુર જિલ્લામાં એક ટ્રેન દુર્ઘટના સામે આવી છે. પેસેન્જર ટ્રેન અને ગુડ્સ ટ્રેન વચ્ચે અથડામણ થઈ છે. મળતી માહિતી મુજબ, મૈસુર દરભંગા એક્સપ્રેસ એક માલગાડી સાથે અથડાઈ હતી. અકસ્માત બાદ બાગમતી એક્સપ્રેસના આઠ ડબ્બા નીચે આવી ગયા હતા. આ ટ્રેનને બાગમતી એક્સપ્રેસ તરીકે ઓળખવામાં આવે છે. માલગાડી સાથે ટ્રેન અથડાયા બાદ ઘટનાસ્થળે આગ ફાટી નીકળી હતી. આ અકસ્માતમાં હજુ સુધી કોઈ જાનહાનિના અહેવાલ નથી. ઘાયલોને હોસ્પિટલમાં દાખલ કરવામાં આવી રહ્યા છે.

રેલવેએ ઘટનાની કરી પુષ્ટિ
રેલ્વે પોલીસના જણાવ્યા અનુસાર તમિલનાડુના કાવરપેટ્ટાઈમાં એક એક્સપ્રેસ ટ્રેન ઉભેલી ટ્રેન સાથે અથડાઈ હતી. જેના કારણે અનેક લોકો ઘાયલ થયા હતા. આ ઘટનાને પગલે સ્થળ પર આગ પણ ફાટી નીકળી હતી. પ્રારંભિક અહેવાલો સૂચવે છે કે આ ઘટનામાં ટ્રેન નંબર 12578, મૈસુર-દરભંગા એક્સપ્રેસ અને એક માલસામાન ટ્રેન સામેલ છે.