ઓસ્ટ્રેલિયાને 2026ના T20 વર્લ્ડ કપમાં મોટો ફટકો પડ્યો છે. ટીમના કેપ્ટન મિશેલ માર્શ ટુર્નામેન્ટમાંથી બહાર થઈ ગયો છે. માર્શને ગ્રોઇન ઇન્જરી થઈ છે, જેના કારણે તે 11 ફેબ્રુઆરીએ આયર્લેન્ડ સામેની પહેલી મેચ રમી શક્યો ન હતો. ત્યારબાદ, સમાચાર આવ્યા કે માર્શને સમગ્ર વર્લ્ડ કપમાંથી બહાર કરી દેવામાં આવ્યો છે અને તેમના સ્થાને સ્ટીવ સ્મિથને ઓસ્ટ્રેલિયન ટીમમાં સ્ટેન્ડ-બાય ખેલાડી તરીકે સામેલ કરવામાં આવ્યો છે.

ઓસ્ટ્રેલિયન ક્રિકેટ બોર્ડે એક સત્તાવાર નિવેદન જારી કરીને જણાવ્યું હતું કે મિશેલ માર્શને ગ્રોઇન ઇન્જરી (જાંઘના ઉપરના ભાગમાં) અને આંતરિક રક્તસ્રાવ થયો છે. તેમને આરામ અને પુનર્વસનની જરૂર છે.

સ્ટીવ સ્મિથની વાપસી

બોર્ડે તેના નિવેદનમાં એ પણ સ્પષ્ટ કર્યું છે કે મિશેલ માર્શનું મેદાનમાં વાપસી મેડિકલ ટીમની મંજૂરી પછી જ શક્ય છે. સ્મિથ શ્રીલંકામાં ઓસ્ટ્રેલિયન ટીમમાં સ્ટેન્ડ-બાય ખેલાડી તરીકે જોડાશે. સ્ટીવ સ્મિથે ફેબ્રુઆરી 2024થી ઓસ્ટ્રેલિયા માટે T20 મેચ રમી નથી. પરંતુ તાજેતરમાં, બિગ બેશ લીગમાં સિડની સિક્સર્સ માટે તેણે શાનદાર પ્રદર્શન કર્યું હતું, જેમાં તેણે સદી ફટકારી હતી. સ્મિથે 2025-26 BBL સીઝનમાં 59.80 ની સરેરાશ સાથે 299 રન બનાવ્યા હતા.

ઓસ્ટ્રેલિયાની પહેલી મેચ 11 ફેબ્રુઆરીએ આયર્લેન્ડ સામે હતી. ટ્રેવિસ હેડ મિશેલ માર્શની ગેરહાજરીમાં કાંગારૂઓનું નેતૃત્વ કરી રહ્યા છે. ઓસ્ટ્રેલિયન ટીમ પહેલાથી જ પેટ કમિન્સને ગુમાવી ચૂકી છે, જે પીઠની સમસ્યાઓને કારણે વર્લ્ડ કપમાંથી બહાર થઈ ગયો હતો.