રાજકોટ ગ્રામ્ય એસઓજીની ટીમે ગોંડલ તાલુકાના આંબરડી ગામે દોઢ કિલો ગાંજાના સાથે કાલાવડના મોરીદડમાં રહેતા શખસ અને જેતપુર પંથકમાં રહેતા તેના માસાને ઝડપી લીધા હતાં.પોલીસે ગાંજો,મોબાઇલ અને બાઇક સહિત કુલ રૂ.૮૦,૨૦૦ નો મુદામાલ કબજે કરી કાયદેસરની કાર્યવાહી કરી હતી. મોરીદડમાં રહેતો ભત્રીજો અહીં જેતપુર પાસે રહેતા માસાને ગાંજો આપવા આવ્યો હતો.દરમિયાન પોલીસે બંનેને ઝડપી લીધા હતાં. આરોપી ગાંજો કોની પાસેથી લાવ્યો હતો? બંને નશાના બંધાણી હોવાથી ગાંજો સાથે રાખ્યો હતો કે બંને મળી ગાંજાનો વેપલો કરતા હતા સહિતની બાબતો અંગે પોલીસ તપાસ ચલાવી રહી છે.

જાણવા મળતી વિગતો મુજબ,રાજકોટ રેન્જ આઇજી અશોકકુમાર યાદવ અને રાજકોટ જિલ્લા પોલીસ વડા હિમકરસિંહની સૂચનાના પગલે રાજકોટ જિલ્લામાં ગેરકાયદે માદક પદાર્થની હેરફેર અટકાવવા માટે પોલીસ પ્રયત્નશીલ હોય તેવામાં ગ્રામ્ય એસઓજી પીઆઇ એફ.એ.પારગીની રાહબરી હેઠળ ટીમ પેટ્રોલીંગમાં હતી દરમિયાન હેડ કોન્સ. પ્રહલાદસિંહ રાઠોડ, અરવિંદભાઇ દાફડા અને વિરરાજભાઇ ધાધલને મળેલી બાતમીના આધારે ગોંડલ તાલુકાના આંબરડી ગામ પાસેથી નરેશ લાલભાઇ ઠાકોર(ઉ.વ ૨૬ રહે. મોરીદડ ગામની સીમમાં તા. કલાવાડ,મૂળ સુબાપુરા જી.પાટણ) અને અજુ ભુદરભાઇ માવરીયા(ઉ.વ ૬૫ રહે. જેતપુર બાયપાસ જુનાગઢ રોડ, કાળુભાઇ પાંભરની વાડીમાં જેતપુર, મૂળ વાઘપુરા તા. સમી.જી.પાટણ) ને ઝડપી લઇ તેમની પાસેથી રૂ.૧૫,૨૦૦ ની કિંમતનો ૧ કિલો ૫૨૦ ગ્રામ ગાંજાનો જથ્થો ઝડપી લીધો હતો.પોલીસે ગાંજાનો આ જથ્થો અને ત્રણ મોબાઇલ ફોન તથા બાઇક સહિત કુલ રૂ.૮૦,૨૦૦ નો મુદામાલ કબજે કરી બંને આરોપી સામે ગોંડલ તાલુકા પોલીસ મથકમાં એનડીપીએસ એકટની કલમ હેઠળ ફરિયાદ દાખલ કરાવી હતી.

વધુમાં જાણવા મળતી વિગતો મુજબ, કાલાવડના મોરીદડ ગામે રહેતો નરેશ અને અહીં જેતપુર પંથકમાં રહેતો અજુ બંને માસા-ભત્રીજા હોય બંને જમીન ભાગમાં રાખી ખેતીકામ કરે છે.નરેશ તેના માસાને ગાંજો આપવા આવતો હોવાની બાતમીના આધારે પોલીસે તેને ઝડપી લીધો હતો. આરોપી ગાંજો કોની પાસેથી લાવ્યો હતો? બંને નશાના બંધાણી હોવાથી ગાંજો સાથે રાખ્યો હતો કે બંને મળી ગાંજાનો વેપલો કરતા હતા સહિતની બાબતો અંગે પોલીસે તપાસ હાથ ધરી છે.આ કામગીરીમાં એએસઓજીના એએસઆઇ સંજયભાઇ નીરજંની,અતુલભાઇ ડાભી,હેડ કોન્સ. વિજયભાઇ વેગડ, મયુરભાઇ વીરડા,શિવરાજભાઇ ખાચર,કોન્સ. વિજયગીરી ગૌસ્વામી, ચીરાગ કોઠીવાર, રઘુભાઇ ઘેડ, વિપુલભાઇ ગોહિલ, અને અમુભાઇ વીરડા સાથે રહ્યા હતાં.