સુરતમાં થયેલી હત્યામાં બનાવ નજરે જોનાર જસદણનો યુવાન ઓળખ પરેડમાં આરોપીને ઓળખી ન શકતા આ બાબતનો ખાર રાખી મૃતકના ભાઈ સહિતના પરિવારજનોએ યુવાનને માર માર્યો હતો. જે અંગે જસદણ પોલીસ સ્ટેશનમાં ફરિયાદ નોંધાવવામાં આવી છે.
જસદણમાં ગંગા ભુવન શેરી નંબર 4 માં રહેતા તૃષિત ભરતભાઈ ધોરડા(ઉ.વ 27) નામના યુવાને નોંધાવેલી પોલીસ ફરિયાદમાં આરોપી તરીકે જસદણમાં જ રહેતા તેજસ ભરતભાઈ રાઠોડ, તેજસનો કુટુંબીભાઈ લાલો, લાલાનો ભાઈ, તેજસના મમ્મી અને તેજસના કાકા ભરતભાઈના નામ આપ્યા છે.
યુવાને પોતાની ફરિયાદમાં જણાવ્યું હતું કે તે ટ્રાન્સપોર્ટનો ધંધો કરે છે તા. 30/7 ના રાત્રિના દસેક વાગ્યે તે જમી માર્કેટિંગ યાર્ડ સામે બેસવા જતો હતો ત્યારે તેણે તેના ભાઈને પૂછતા તે ત્યાં બેસવા ગયો ન હોવાનું જણાવતા યુવાન વિંછીયા બાયપાસ દ્વારકાધીશ હોટેલથી પરત ફર્યો હતો. ત્યારે રસ્તામાં વીંછિયા રોડ પર તાલુકા પંચાયત પાસે પહોંચતા ચાલુ ગાડીએ તેજસ કિશોર રાઠોડએ પથ્થર નો ઘા કરતા યુવાને બાઇક ઉભું રાખ્યું હતું. દરમિયાન આરોપીઓ તેની પાસે આવી ગાળો આપી ઢીકાપાટુનો માર મારવા લાગ્યા હતા. તેમજ લાકડી વડે પણ મારમાર્યો હતો દરમિયાન અહીં એકત્ર થયેલા લોકોએ યુવાનને વધુ મારમાંથી બચાવ્યો હતો ત્યારબાદ તેને સારવાર માટે જસદણ સરકારી હોસ્પિટલ ખસેડવામાં આવ્યો હતો.
યુવાને પોતાની ફરિયાદમાં વધુમાં જણાવ્યું હતું કે, આરોપી તેજસ રાઠોડના ભાઈ અજય રાઠોડની સુરતમાં હત્યા થઈ હતી. તે સમયે યુવાન પણ સુરત રહેતો હતો જે બનાવ યુવાને નજરે જોયો હોય પરંતુ ઓળખ પરેડમાં યુવાન આરોપીને ઓળખી ન શકતા જે બાબતનો ખાસ રાખી આ હુમલો કરવામાં આવ્યો હતો. આ અંગે યુવાનની ફરિયાદ પરથી જસદણ પોલીસે આરોપીઓ સામે ગુનો નોંધી જરૂરી કાર્યવાહી કરી હતી.