માઇક્રોઆરએનએ શોધનાર બે અમેરિકન વૈજ્ઞાનિકો, વિક્ટર એમ્બ્રોઝ અને ગેરી રુવકુનને આ વર્ષે મેડિસિનમાં નોબેલ પુરસ્કાર મળશે. વર્ષ 2024 માટે મેડિસિનના નોબેલ પુરસ્કારની જાહેરાત કરવામાં આવી હતી. બંને વૈજ્ઞાનિકોને 10 ડિસેમ્બરે સંયુક્ત રીતે એવોર્ડ આપવામાં આવશે.
એમ્બ્રોસે હાર્વર્ડ યુનિવર્સિટીમાં માઇક્રો આરએનએ પર સંશોધન કર્યું હતું. તેઓ યુનિવર્સિટી ઓફ મેસેચ્યુસેટ્સ મેડિકલ સ્કૂલમાં પ્રાકૃતિક વિજ્ઞાનના પ્રોફેસર છે, જ્યારે રુવકુને મેસેચ્યુસેટ્સ જનરલ હોસ્પિટલ અને હાર્વર્ડ મેડિકલ સ્કૂલમાં આ સંશોધન કર્યું હતું.
ઈમ્પીરીયલ કોલેજ લંડનના મોલેક્યુલર ઓન્કોલોજીના લેક્ચરર ડો.ક્લેર ફ્લેચરના જણાવ્યા અનુસાર, આ સંશોધનથી વૈજ્ઞાનિકો માટે કેન્સર જેવા રોગોની સારવાર કરવાનો માર્ગ ખુલી ગયો છે. માઇક્રોઆરએનએ કોષોને નવા પ્રોટીન બનાવવા માટે આનુવંશિક સૂચનાઓ આપે છે. આ દવાઓના વિકાસમાં અને રોગોની સારવાર માટે બાયોમાર્કર્સ તરીકે ઉપયોગી થઈ શકે છે. ત્વચા કેન્સરની સારવારમાં માઇક્રોઆરએનએ ટેક્નોલોજી કેવી રીતે મદદરૂપ થઈ શકે છે તે જોવા માટે ક્લિનિકલ ટ્રાયલ ચાલી રહી છે.
જીવવિજ્ઞાની ગેરી બ્રુસ રુવકુને બીજા માઇક્રોઆરએનએ, એલઈટી-7ની શોધ કરી. તેઓએ શોધ્યું કે લિન-4, વિક્ટર એમ્બ્રોઝ દ્વારા ઓળખાયેલ પ્રથમ માઇક્રોઆરએનએ, આરએનએને કેવી રીતે નિયંત્રિત કરે છે. રુવકુનનો જન્મ માર્ચ 1952માં કેલિફોર્નિયામાં થયો હતો. તેઓ મેસેચ્યુસેટ્સ જનરલ હોસ્પિટલના જીવવિજ્ઞાની અને હાર્વર્ડ મેડિકલ સ્કૂલમાં જિનેટિક્સના પ્રોફેસર છે.
તેમણે 1973માં યુનિવર્સિટી ઓફ કેલિફોર્નિયા, બર્કલેમાંથી સ્નાતકની ડિગ્રી અને 1982માં હાર્વર્ડ યુનિવર્સિટીમાંથી બાયોફિઝિક્સમાં પીએચડીની ડિગ્રી મેળવી, જ્યાં તેમણે બેક્ટેરિયલ નાઇટ્રોજન ફિક્સેશન જનીનોનો અભ્યાસ કર્યો. તેઓ 1985 થી હાર્વર્ડ મેડિકલ સ્કૂલમાં જિનેટિક્સના પ્રોફેસર છે.ગયા વર્ષે, કોવિડ-19 સામે એમઆરએનએ રસી બનાવવાનું શક્ય બનાવનાર શોધ માટે કેટાલિન કેરીકો અને ડ્રૂ વેઈસમેનને મેડિસિનનું નોબેલ પુરસ્કાર એનાયત કરવામાં આવ્યો હતો.સ્વીડિશ વૈજ્ઞાનિક અને ડાયનામાઈટના શોધક આલ્ફ્રેડ નોબેલના નામ પરથી આ પુરસ્કાર 1901 થી વિજ્ઞાન, સાહિત્ય અને શાંતિના ક્ષેત્રોમાં નોંધપાત્ર સિદ્ધિ માટે આપવામાં આવે છે.