ઘરે બેઠા ઓનલાઈન ખરીદીનો ક્રેઝ વધી રહ્યો છે, પરંતુ શું તમને બજાર ભાવ કરતા ઓછા ભાવે ઘરે મળી રહેલી પ્રોડક્ટ્સ ખરેખર ઓરિજિનલ છે કે નહીં? શું તમે ક્યારેય આ જાણવાનો પ્રયાસ કર્યો છે? વેરહાઉસમાંથી તમારા ઘરે માલ પહોંચવા પાછળ કોઈ કૌભાંડ ચાલી રહ્યું છે, તમને આઘાત લાગશેપણ આ બિલકુલ સાચું છે. બ્યુરો ઓફ ઇન્ડિયન સ્ટાન્ડર્ડ્સ (બીઆઈએસ) એ દિલ્હીમાં મોટી કાર્યવાહી કરી છે. બીઆઈએસએ એમેઝોન અને ફ્લિપકાર્ટના વેરહાઉસ પર દરોડા પાડ્યા છે અને આઈએસઆઈ માર્ક વાળી અને વગરની નકલી વસ્તુઓ જપ્ત કરી છે.

દરોડામાં 3500થી વધુ પ્રોડક્ટ્સ જપ્ત કરવામાં આવી
દરોડા દરમિયાન, 3500થી વધુ પ્રોડક્ટ્સ જપ્ત કરવામાં આવી હતી. જે આઈએસઆઈ માર્ક વિના વેચાઈ રહ્યા હતા, એટલું જ નહીં, આ ઉત્પાદનો પર નકલી આઈએસઆઈ લેબલ પણ હતા. જપ્ત કરાયેલા ઉત્પાદનોમાં ગીઝર, ફૂડ મિક્સર અને અન્ય રોજિંદા ઘરગથ્થુ ઉપકરણોનો સમાવેશ થાય છે.

જપ્ત કરાયેલા માલની કુલ કિંમત 70 લાખ રૂપિયા
આનો અર્થ એ થયો કે આ બધી પ્રોડક્ટ્સ નકલી છે, જેનો અર્થ એ થયો કે આ પ્રોડક્ટ્સનો ઉપયોગ કરતી વખતે, નબળી ગુણવત્તાને કારણે ઇલેક્ટ્રિક શોકનું જોખમ વધારે રહે છે. એવું કહેવું ખોટું નહીં હોય કે નકલી ઉત્પાદનો વેચીને, કંપનીઓ ફક્ત તમારા પૈસા સાથે જ નહીં પરંતુ તમારા જીવન સાથે પણ રમત રમી રહી છે. જપ્ત કરાયેલા માલની કુલ કિંમત 70 લાખ રૂપિયા છે.

590 જોડી સ્પોર્ટ્સ ફૂટવેર જપ્ત કર્યા
દિલ્હીના ત્રિનગરમાં સ્થિત ફ્લિપકાર્ટની પેટાકંપની ઇન્સ્ટાકાર્ટ સર્વિસીસ પ્રાઇવેટ લિમિટેડ પર પણ દરોડા પાડવામાં આવ્યા હતા. દરોડા દરમિયાન, બીઆઈએસ ટીમે આઈએસઆઈ ચિહ્ન અને ઉત્પાદન તારીખ વિનાના ઉત્પાદનો જપ્ત કર્યા. બ્યુરો ઓફ ઈન્ડિયન સ્ટાન્ડર્ડ્સની ટીમે લગભગ 6 લાખ રૂપિયાની કિંમતના 590 જોડી સ્પોર્ટ્સ ફૂટવેર જપ્ત કર્યા છે.

ઉત્પાદન, આયાત, વિતરણ, વેચાણ કરવા પર પ્રતિબંધ
છેલ્લા એક મહિનામાં, બીઆઈએસ ટીમે દેશના વિવિધ રાજ્યોમાં સમાન કામગીરી હાથ ધરી છે અને દિલ્હી, ગુડગાંવ, ફરીદાબાદ, લખનૌ અને શ્રીપેરુમ્બુદુરમાં અનેક હલકી ગુણવત્તાવાળા માલ જપ્ત કર્યા છે. બીઆઈએસ ના માન્ય લાઇસન્સ અથવા પાલન પ્રમાણપત્ર (સીઓસી) વિના આ ઉત્પાદનોનું ઉત્પાદન, આયાત, વિતરણ, વેચાણ કરવા પર પ્રતિબંધ છે.